Inatsisilerinermi professori Ajornartooqqaneq soorluuna sivisulaartoq
Akiliutitut ittunik Folketingip atugassiissutaanik nammineq atugassanik pisiortortoqarsinnaanngilaq.
Inatsisilerinermi professori taama oqarpoq. Taassumalu Aleqa Hammondip taama sivisutigisumik ajornartooqqasimanera tupigusuutigaa.
- Akiliut suliffeqarfimmit namminersortumit, pisortat oqartussaqarfiit Folketingimiilluunniit tunnniunneqarsimanersoq apeqqutaanngilaq, taamaattoq soorunami namminermut atugassaanngilaq, Lars Bo Langsted, Aalborgip universitetetiani inatsisilerinermi professoriusoq, KNR-imut oqarpoq.
Aamma atuaruk Aleqap akiitsoqarnini nassuerutigaa
Aningaasanik atuisimanermut nalunaarsukkat, Danskit aviisiata Ekstrabladip pissarsiarisimasai, naapertorlugit, Aleqa Hammondip korti juunip 18-aniit juulip aqqarnanut imminerminut atorsimavaa.
Taamannallu ajornartooqqarneq Lars Bo Langstedip sivisuutut nalilerpaa.
- Nammineq kortiutit atornerlunneqarsimatillugit, ajornartooqqaneq soorluuna sivisulaartoq. Nammineq aningaaserivigisaq sukkanerusumik ikiuussinnaasarpoq, kisianni pissutsinik immikkut ittunik atuuttoqarsimanersoq oqaatigisinnaasussaanngilara, Langsted KNR-imut oqarpoq.
Aamma atuaruk Aleqa Facebookkikkut nassuiaateqartoq
Aammalumi pissutsit immikkut issinnaapput, sulisitsisorlu oqarsinnaalluni sulisup sulinermini kortini namminerminut qaammatip ingerlanerani atorsinnaagaa. Taamaaliorneq ajortooqqanertut taaneqarsinaavoq.
- Taava kortit tunniunneqarsimasut, allanullu atortussaagaluartut, ajornartoornermi atorneqarsinnaapput, kisianni taava aningaasat atorsimasat ajornartooqqajunnaaranni utertinneqartariaqarput, Langsted oqarpoq.
Taamaammat Aleqa Hammond suliffimmi kortiutaa atorlugu 12.000 koruunit sinnerlugit nalilinnik namminerminut pisiortornermigut pillarneqaataasinnaasumik iliuuseqarsimanersoq, professori imaaliallaannaq oqarsinaanngilaq. Apeqqutaavorli allaffeqarfiup taamaaliornissa akuerisimaneraa.
- Piffissami sivisunerusumik atuisoqassappat, taavalu aamma folketingimut ilaasortaq suliaminut tunngatillugu angalanngippat, allattoqarfik taamaaliorsinnaanersoq apeqqutaavoq, Lars Bo Langsted oqarpoq.
Aamma atuaruk Tusagassiuut: Aleqa Hammond akileraartartut aningaasaataannik atornerlueqqittoq
