Air Greenland DASH-7-eeruppoq
Timmisartut pineqartut Canadamiut timmisartuutileqatigiiffiannit Trans Capital Airimit Torontomi qullersaqarfeqartumit pisiarineqarput.
Tunisinermi isumaqatigiissut naapertorlugu timmisartut siullit marluk pilertortumik tunniunneqassapput. Timmisartullumi tunineqartup siulliup Kalaallit Nunaat ippassaq qimappaa, Torontoliarlunilu. Tulliata qaammat ataaseq qaangiupaat malissavaa, kingullerlu oktobarimi malinnaatinneqassalluni.
Air Greenlandimi pisortaanerup Michael Højgaardip oqaatigaa, timmisartut DASH-7-it, timmisartunik suluusalinnik ilaasunik angallassineq ineriartortitseqataaffigilluarsimagaat. Taakku timmisartutut aalajaatsutut qajannaatsutullu tusaamaneqaleriartorsimapput.
- Taamaattumik DASH-7-it inuulluaqqusariaqaleratsigik uggorilaanngitsuunngilarput, Michael Højgaard oqarpoq.
DASH-7-it kingulliit pingasut tunineqarnerat, Air Greenlandip nunami namminermi timmisartunik suluusalinnik nutarterinerata ilagaa. Ukiup matuma ingerlanerani DASH-8-t kingulliit marluk atorneqalissapput. Timmisartuutileqatigiiffik taamaalilluni DASH-8-nik arfineq marlunnik pigisaqalissaaq.
- DASH-8-aannavinnik atuilernitsigut ingerlatsinerput iluaquserneqassaaq, taartissat akikinnerulissallutik orsussamullu 25 procentit angullugit ileqqaarsinnaassaagut, allaffissornerpullu pisariillisarneqassalluni, Michael Højgaard taama erseqqissaavoq.