Psykiatri: Agathe F.-ip nappaatit suussusersiaarneqarnerusariaqarsorai

Tarnikkut nappaateqarneq pillugu ataatsimiinneq peqqissutsimut naalakkersuisumit ullumi ammarneqarmat  inuit 100-t missaanniittut peqataapput.

- Piaarnerpaamik iliuuseqarnissaq, piaarnerpaamik suussusersiliinissaq taanna pingaaruteqartorujussuuvoq. Taavalu qanoq passunneqarnissaa eqqortumik taakku pingaaruteqarlutik taavalu aamma ilaqutaasut qanoq atugaqartarnerat aamma taakkua ilisimassallugit pingaaruteqarpoq, Agathe Fontain taama oqarpoq.

Taassuma nammineq inuttut sakkortusinnaasumik misilittagaqarsimanini oqaluttuaraa. 

Nammineq ernermi meeraallunili tarnikkut nappaateqalersimanera pillugu oqaluttuaraa, erneralu inuusuttuaranngormat nappaataa aatsaat suussusersineqarpoq, tamannalu oqitsuinnaasimanngilaq. 

Taamaammat tarnikkut nappaatit suussusersiaarneqarnissaat pingaartuusoraa.

Peroriartornermi avatangiisit sunneeqataapput

Alliartornermi atugarisimasat aqqusaarsimasallu peqqutaallutik ilaatigut tarnimikkut "qajannartunngorsinnaasut" ataatsimeersuarnermi oqalugiartut ilaasa 2014-imi misissuinermit paasisat saqqummiuppaat.

 - Eqqugaasinnaasut ilaat qiviassagutsigit, assersuutigalugu amerlanerit angerlarsimaffimmi imigassartorfiusumi peroriartortuusarput. Tamatumalu qaqilerneqarnissaa pingaaruteqarsoraara, Innuttaasut peqqissusaannik Naalagaaffiup misissuiffiani ilisimatooq Christina V. L. Larsen taama oqarpoq. 

Innuttaasut tarnikkut peqqissuunissaat anguniarlugu sioqqutsilluni iliuuseqarnissaq sakkussaavoq pingaarutilik.

- Pingaaruteqarpoq tarnikkut peqqissuunerup inuunermi nikerarsinnaanera eqqaamassallugu, nikerartuuvoq tamannalu peqqissuunissaq anguniarlugu peqataaffigisinnaavarput. Peroriartornermi atugassarititaasut aamma pingaaruteqartupilussuupput, tamannalu eqqumaffisariaqarpoq. Taamaalilluni meeqqat meeraanerannit  inuuniarnermikkut atugaat pitsanngorsarneqarsinnaasut, oqariartuutit pingaarnerit ilagaat, Christina V. L. Larsen KNR-imut taama oqarpoq.