Greenpeace: Isumaqatigiissutip Danmark aatsitassanut politikkimut sunniuteqartittariaqaraluarpaa

Namminersorlutik Oqartussat illersornissaqarfillu saleeqatigiittarnissamik isumaqatigiissuteqareersullu  Danmarkimi Greenpeace taama isummerpoq.

Kalaallit Nunaanni tre sømilip killeqarfiata iluani imaani mingutsitsineqassappat isumaqatigiissummi nutaami Danmark saleeqataanissamut akuersimmat ajunngilluinnarpoq.

Greenpeace Danmarkimi imartanut akisussaasuusoq, Magnus Eckeskog taama oqarpoq.

-  Kalaallit Nunaanni mingutitsisoqartinnagu Danmarkip akisussaaffia annerulermat nuannerpoq. Tassa maanna Danmarkip taanna pillugu inissisimanera aalajangiiffigineqarpoq.

Greenpeaceli isumaqarpoq avatangiisinik annertuumik issittup imartaani mingutitsineqassappat isumaqatigiissut iluaqutaavallaarnavianngitsoq.

Danmarkimi Kalaallit Nunaallu ataatsimoorlutilluunniit akiuiniaraluarpata annertuumik mingutitsineqassappat naammannavianngilaq.

Taamaattumik Danmark uuliasiornissat Kalaallit Nunaata imartaanik mingutitseratarsinnaasut eqqarsaatigalugit aalajangeeqataasariaqartoq, Greenpeace isumaqarpoq.

Aamma aatsitassarsiorsinnaanermut oqartussaaffik Kalaallit Nunaataluunniit 2010-mi tigusimagaluarpagu.

- Soorunami Kalaallit Nunaata aatsitassat nammineq pigivai. Isumaqatigiissummili uani uuliamik akuutissanilluunniit mingutsitsisoqassappat saliinissamut naammattunik atortussaqannginneq akuerineqarpoq.

Kalaallit Nunaat isumaqatigiissuteqarnermigut mingutitsisoqaraluarpat Danmarkimik akiligassiivoq, taanna oqarpoq.

- Danmark peqataagami akiliisussaallunilu, isumaqarpugut aamma avatangiisit isumannaallisarnerinut sunniuteqarsinnaassasoq. Uanimi Kalaallit Nunaata namminersortuunera pineqanngilaq, imartalli isumannaallisarnissaa pineqarluni, Greenpeace isumaqarpoq.

Isumaqatigiissut isumaqatigiissummik 1989-imeersumik aalajangersaaneruvoq, tassanilu pineqarpoq Kalaallit Nunaanni piareersimasut mingutitsineq namminneq aaqqissinnaanngippassuk Danmarki ikiuussinnaasoq.

Sinerissap qanittuani mingutitsisoqartillugu isumaqatigiissummi  saliinissamut Kalaallit Nunaata Danmark ikiuuteqqusinnaavaa.

Kingornalu mingutsitsisumut akiligassaq nassiullugu.