Nunatsinni eqqagassarpassuit sumi tamaaniittut takornariaqarnermut ajoqusiisinnaapput

Tamakkulu takornarianit puigorneqarneq ajorput.

Nunatsinni takornariartitsinermi siunnersuisoqatigiiffiup, Visit Greenlandip illoqarfiinni eqqakkat pillugit tusarniaanerannit tamanna paasinarsivoq.

Nunatsinni illoqarfimmi takornarissanit tikinneqarnerpaasartumi, Ilulissani eqqakkat sumitamaaniittut qanoq iliuuseqarfiginiarlugit, Namminersorlutik Oqartussat 21,5 millioner koruuninik Qaasuitsup Kommunianut aningaasaliipput, taakkunannga 7 milluioner koruunit Ilulissaniinnaq atugassaallutik.

"Ilulissani illut qalipaatigissut eqqaanni eqqakkat sumi tamaaniittut taama takussaatigimmata tupinnaqaaq. Qassutikut, sikkilikut, biilikut, pisattat atorunnaakkat allarpassuillu ilaatigut ukiuni arlalinni attorneqaratik uninngaannartut".

Aamma atuaruk Kujallermi eqqagassanik navianaatilinnik isumaginninneq pitsaavallaanngitsoq

Nunatsinni takornariartitsinermi siunnersuisoqatigiiffiup, Visit Greenlandip takornarissanik apersuineranni takornariaq ataaseq taama oqarpoq.

Upernaakkut aputip aannerata kingorna, nunami naasussat ivikkallu kisimik takussaaneq ajorput aamma ukiup ingerlanerani inuit eqqagaat takussaalersarput.

Tamannalu qanoq maanna iliuuseqarfigineqassasoq, Qaasuitsup Kommuniani sanaartornermut avatangiisinullu ingerlatsivimmi pisortaq, Jens Mikkelsen oqarpoq.

- Ilumoorpoq eqqakkat umiarsualivimmiittut illoqarfimmilu sumi tamaaniittut takussaammata. Tamakkulu qanoq iliuuseqarfigilerpagut taamaalilluta takornarissat illoqarfimmut saligaatsumut tikittalerniassammata.

Jens Mikkelsebn oqarpoq.

Qaasuitsup Kommuniani eqqakkat sumi tamaaniittut qanoq iliuuseqarfigineqarnissaat siunertaralugu, Namminersorlutik Oqartussat Qaasuitsup Kommunianut aningaasanik 21,5 millioner koruuninik tapiissuteqrput, taakkunannga 7 millioner koruunit Ilulissaniinnaq atugassaallutik.

Ilulissani sumut tamaannga eqqaaneq aamma eqqaavissuaq qangali ajornartorsiutaasut, kommunip aningaasarliornerata kinguneranik qanoq iliuuseqarfigineqartarsimanngitsut maanna qanoq iliuuseqarfigineqartussanngortut, Jens Mikkelsen oqarpoq.

- Eqqaavissuup qanoq iliuuseqarfigineqarnissa salliunneqartarsimanngilaq. Tamanna kommunip aningaasarliorneranik pissuteqarpoq.

Jens Mikkelsen oqarpoq.

Aamma atuaruk Apummit oqqiortitat saqqummerartut salinneqalerput

Tassalu Namminersorlutik Oqartussat maanna aningaasaliinerisa kinguneranik tamanna qanoq iliuuseqarfigineqartussanngortoq, Jens Mikkelsenip nuannaarutigaa. Taannalu nangilluni ima oqarpoq.

- Illoqarfimmit eqqakkat tamarsuarmik ataatsimut eqqaavissuarmut igiinnarneqartartut pitsaanerusumik suliarineqartalernissaat maanna tullinnguuppoq.

Qaasuitsup Kommuniani sanaartornermut avatangiisinullu ingerlatsivimmi pisortaq, Jens Mikkelsen oqarpoq.

Kommuni Kujallermi eqqaavissuit illoqarfinni pingauusuni taamatullu siullermik nunaqarfinni tallimani pitsaanerulernissaat pillugit, Namminersorlutik Oqartussat 11. millioner koruuninik aamma aningaasaliipput.

Illoqarfinni nunaqarfinnilu eqqakkat katersorneqarnissaannik suliniuk 'Saligaatsoq' aqagumiit aallartinneqassaaq.