Imermik tuniniaanermik ingerlatsivik atornerlunniarsimagaluaraat
Juunip 27-ani naqqissorneqarpoq: Allaqqaaraluarpugut Aqua Green Holding nunatsinni ingerlateqatigiiffiusoq. Tamannali eqqunngilaq. Ingerlatseqatigiiffik Danmarkimi nalunaarsorneqarsimavoq, niuernissamillu isumassarsiaq tassaalluni Nunatsinni imermik avammut nioqquteqarnissaq. Allaaserisami tamanna naqqinneqarpoq.
Danskit tusagassiuutaasa arlallit, soorlu Jyllandsposten aamma finans.dk taama allaaserisaqarput.
Eqqartuussissuserisut tassaasut Johan Schlütter, Lars Halgreen aamma Susanne Fryland arlalinnik unnersuutigineqarput piginnaatitaanermik atornerluisimasutut peqquserluuteqarsimasutullu, taakkununnga ilaalluni kalaallit imermik tuniniaanissamut suliniutaat.
Bagmandspolitiit naapertorlugit eqqartuussissuserisut pingasut 2015-imi upernaakkut ingerlatsivimmut Aqua Green Holdingimut uisup nuliaasullu piginneqataaffigisaannut piginneqataassutsinik kommissionsaftalenillu nussuisimasutut.
Kommissionsaftalep, tassa isumaqatigiissutip eqqartuussissuserisut pingasut taakku piginnaatippai Aqua Green Holdingi sinnerlugu iliuuseqarsinnaasutut.
Tunisinermi uppernarsaammi piginneqatigiiffiup oqaatigaa piginneqatigiiffimmut allamut tassa Nafwa-mut piginneqataalluni. Taakku takorloorsimavaat imermik Kalaallit Nunaanneersumik nunanut allanut tuniniaaniarlutik.
Nalilinnik nuussinerup kingorna eqqartuussissuserisut taakku piginneqataassutiginerakkatik 200 millioner koruuninik naleqarnerakkatik Nafwa-mut tuniniarsimagaluarpaat oqarlutik taassuma imeq ukiumut 1 milliard kubikmeteri tuniniartalerumaaraa.
Nafwa-mili siulersuisunut ilaasortaq Jan Richard naapertorlugu ingerlatsiviup imeq kuseriarneq ataaserluunniit tunisimanngilaa. Taassuma saniatigut eqqartuussissuserisunut uisoq nuliaasullu ingerlatsivimmut piginneqataanngillat.
Bagmandspolitiit naapertorlugit akiitsoqarfimmut peqquserluuteqarneq immikkut sakkortuujusimasoq finans.dk allaaserisaqarpoq.
