Aavariap ujaarineqartup pisani marluk 40 kilometerit ingerlassimagai

Aavariap Itillip kangerluani periarfeerunneqarnera Qeqqata Politiivinut Sisimiuniittunut pingasunngormat ualikkut nalunaarutigineqarpoq.

Angut ujaarineqartoq aavariaqatinilu ataasinngornermi aggustip aallaqqaataani Qooruarsuaq Killermut niuneqarsimapput.

Pilersaarutillu malillugit aqaguani Umiartortarfinnguamut aaneqartussaasimapput.

Qooqqup iluani 20-25 kilometerinik ilorpasitsigisumi angutip periarfeerunneqartup tuttumik pisaqarnermi kingorna ilani qimappai. Malissallugillu oqarfigisimavai.

Ataasinngormat unnuap qeqqata missaani aavaqatai naapiffissaminnut apuupput ilartillu ujaraluaramikku nassaarisimanngilaat. Taamaammat Itillimut utersimapput ilamillu periarfeerussimanera politiinut nalunaarutigalugu.

Politiit kingorna sumiiffimmi qulimiguulik atorlugu ujarlerput, pingasunngormallu ualikkut nalunaaqutaq pingasup missaani ujaarineqartoq Umiartortarfinnguami nassaarineqarpoq. Ajorani sinerissamut apuussimavoq, sivisuumillu nerisimannginnami nererusussimaqaaq.

- Sunaaffa tuttunik marloraarsimasoq, taakkulu kisimiilluni sinerissamukaassimavai.

Ingerlavia kilometerinik 40-t missaannik isorartutigivoq, aavariarlu sinerissamut apuutinnginnermini qasungaarami silaannarmi arlaleriarluni sinittariaqartarsimavoq, Johan Davidsen Qeqqata Politiivineersoq taama oqaluttuarpoq.