VIDEO Aasianni ilinniarnertuunngorniarfimmi ilinniartitsisoqarniarneq ilinniartut naammagiunnaaraat

Avannaani Ilinniarnertuunngorniarfimmi ilinniartitsisut ima taarseraatsigaat, allaat ilinniartut angusissanerlutik qularilersimallugu ilaallu aamma atuarunnaaginnarsimallutik.

- Eqqortumik oqassaguma, ilinniartorpasssuit massakkut toqqissisimanngilagut. Toqqissisimanngissutima annersaraat ilinniartitsisut taarseraappallaarnerat ilinniartunut sunniuteqarmat, ilinniarnertuunngorniaq Julia Jensen KNR-imut taama oqarpoq.

Aamma atuaruk Ilinniartitsisut nalilersuinermi akissuteqarniarlutik teknikikkut ajornartorsiorsimapput

Pissutsit atuartunit arlalinnit siorna aamma naammagittaalliutigineqarput, tamannalu tunngavigalugu Julia Jensenip elevrådillu pissutsit misissuiffigisimavaat. Ilinniartitsisulli taarseraannerujussuisa ajornartorsiutaanera piujuarsinnarpoq.

- Inuiaqatigiilerinermi qaammatit sisamat ingerlanerini assigiinngitsunik pingasunik ilinniartitsisoqarpugut, suliallu sivisuumik uninngaannarsimasut maanna suliakkiissutigineqarput, naak uagut pisuussuteqanngikkaluartugut, Julia Jensen nassuiaavoq.

Ilinniartut misissuinermi ilaatigut ima allapput:

Ilinniartitsisut taarseraatingaarmata narsartaanissaq qularnarpoq, ingammik ilinniarnertuunngorniarfiup kingorna sumut ingerlariaqqissanerluni nalullugu.

Piareersimasutut misiginngilanga. Ukiuni kingullerni pigasunik ilitsersuineq annikippallaaqaaq, aamma ilinniartunik ilitsersuisut pimoorussinngippallaaqaat.

Ilinniartunit misissuinermi apersorneqartunit 13-iusunit ataasiinnaq ingerlaqqiffiusumik ilinniakkamik aallartitsisimavoq.

Najugarilikkamut sungiussinngitsoortartut

Rektorip Flemming Guntofte Nielsenip ilinniartitsisut taarseraannerujussuisa atuartunut unamminartuusoq ilisimaaraa, taamatulli ineriartortoqarnera allanngortikkuminaatsillugu.

- Ilinniartitsisut ilarpassui najugarilikkaminnik sungiussinngitsoortarput. Taamaasillutillu ilarpassui Danmarkimi ilaquttaminnut utiinnartarput imaluunniit allami atorfimmik naaggaarsinnaanngisaminnik neqeroorfigineqarlutik, rektori Flemming Guntofte Nielsen, ilinniartut erloqissutigisaannik paasinnittoq taama oqarpoq.

- Klassimi nutaamik ilinniartitsisoqalernera naammaginanngilaq. Nutaamik ilinniartitsisoqalersillugu klassit torersumik tassunga tunniunneqartarnissaat qulakkeerniarlugu sulissutigaarput, rektori oqarpoq.

Julia Jensenip siunnersuutigaa rektori ilinniartitsisut nutaat pittuttuisumik isumaqatigiissuteqarfigisalissagai.

- Ilinniartitsisunut nutaanut piumasaqaatit sukaterneqartariaqarsoraakka ukiunullu arlariinnut isumaqatigiissusiornissamik piumasaqaasiortoqarluni. Maannakkutut ingerlatsineq uatsinnut pitsaanngitsumik sunniuteqarpoq.

Nivi Olsen Aasiannukaassaaq

Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisip, Nivi Olsenip Demokraatineersup, ajornartorsiutip nukingernartuunera nassuerutigaa.

- Iliuuseqarfigisariaqarparput, akuersaarneqarsinnaanngilaq. Pissutsit taamaattut akuerisinnaanngilakka. Taamaammat sapaatit-akunnerat ataaseqa qaangiutsinnagu Aasiannukassallunga aalajangerpunga.

- Pissutsit sukumiisumik misissussagikka naatsorsuutigissavaat. Aamma ilinniartut sumut ingerlariaqqinnissatsinnut immersussavaannga. Oqaloqatigiissaagut, Nivi Olsen oqarpoq.

Naalakkersuisoq aamma ilinniartitsisut taarseraannerujussuisa unikaallatsinnissaanut siunnersuutissaqarpoq.

- Ilinniakkap qaffakkiartornera malillugu nunaqavissunik ilinniartitsisoqarnissaq pingaaruteqarnerulersarpoq. Tamannalu aaqqiissutaasinnaavoq ataavartoq, naalakkersuisoq oqarpoq