Aanngajaarniutinut tunngasumik suliamut annertuumut nuimasut pasisaasut
USA-mi naalagaaffiup Miamimi New Yorkimilu unnerluutiginnittussaatitai, USA-mi politiinik ikiaroornartumik akiuiniartunik suleqateqarlutik, Venezuelami inuit nuimasut kokainimik Amerika Avannarlermut anngiortumik tuniniaasarsimasutut pasineqartut misissuiffigileruttorpaat.
Kokainimik anngiortumik siornatigut eqqussuisarsimasut, Venezuelamilu sakkutuut akerlerisanut nuuttut, inuillu Venezuelami pissaaneqartunut qanittumik suleqateqarsimasut paasissutissaataat aallaavigalugit USA-mi oqartussat misissuinertik aallartippaat.
Venezuelap præsidentia Nicolás Maduro misissuinermi ilaatinneqanngilaq, qanittumilli suleqataa Diosdado Cabello misissorneqaleruttorluni.
Cabello Venezuelami inatsisartuni siulittaasuunermi saniatigut partiimi naalakkersuisuutitaqartumi Socialistini siulittaasup tulliatut inissisimavoq. Venezuelami tusagassiortut 20-nit amerlanerusut mamarliisimasutut pasillugit taassuma eqqartuussivitsigut qaammatip siuliani suliassanngortippai. Ikiaroornartunik anngiortumik tuniniaasarsimasutut taallugu allaaserisaqartarsimanerannik pasilliutit mamarliinertut nalilerlugit eqqartuussisulersuuppai.
Diosdado Cabello, USA-p inatsisinik atuutsitsinermut ministereqarfianit pingaarnertut misissorneqarniartoq, ministereqarfimmit tusarfiup Wall Street Journalimut oqaatigaa.
