Aamma Sermersooq amerlanernik akissarsiaqartitserusuppoq
- Aamma uagut isumaginninnermut siunnersortit meeqqat atuarfiinilu ilinniartitsisut amigaatigisorujussuuagut, Kommuneqarfik Sermersuumi borgmesterip sinniisussaa Justus Hansen oqarpoq.
- Isumaqatigiissutit avaqqullugit, amerlanerusunik akissarsiaqartitsisinnaagutta iluaqutaasorujussuussaaq. Kommune Kujalliup iluamik alloriarnera soorunami tamakkiisumik tapersersorparput, Justus Hansen oqarpoq.
Kommune Kujallermit isumassarsiaqarluartoqartoq
Kommune Kujallermit isumaqatigiissutit aqqutigalugit sulisussat aalajangersimasunut ajunngitsorsiassanik neqerooruteqarsinnaanissaq anguniarlugu inatsimmik allannguinissaq pillugu aningaasaqarnermut naalakkersuisoqarfimmut pisortatigoortumik saaffiginnissuteqartoqareersoq Justus Hansen taama nalunaarpoq.
Akissarsiat amerlanerusut saniatigut aamma angerlarsimaffissanik pilerinarnerusunik, bonusisiassanik, Nuullu avataani sulisunut immikkut tapisiaqartarnernik neqerooruteqarsinnaanerit aqqutissaasinnaasut, Kommune Kujallermi borgmesterip sinniisussaa, Simon Simonsen isumaqarpoq.
Aamma atuaruk Akissarsiat amerlanerusut Kommune Kujallermit piumasarineqartut
- Kisianni aamma Nuummi sulisut pisariaqartinneqartut sulilersinnissaat ajornakusoorpoq. Inuit qanoq akissarsiaqassanerlutik paasigaangassuk, ilaat sulilerusukkunnaartarput, Justus Hansen, Kommune Kujallermit oqariartuutigineqartumut isumaqataasoq, oqarpoq.
Tasiilami isumaginninnermut siunnersortitut atorfiit pingasut inuttaqanngitsut, Justus Hansenip erseqqissaatigaa. Akissarsianillu amerlanerusunik neqerooruteqartoqarsinnaappat atorfinitsitsinerit ajornannginnerulissasut taassuma qularinngilaa.
Aamma atuaruk Tasiilami isumaginninnermi suliat 520-it
Akissarsiatigut unammillertut
Taamaasillutik kommunit namminersortunut akissarsiaqartitsinermut unammillissapput. Pisortalli suliffeqarfiutaasa akissarsiaqartitsinermi namminersortutut periarfissaqarnissaat Kommuneqarfik Sermersuumit neriuutigineqarpoq, naak pisortat akissarsiaqartitsinermi siuttunngorsinnaagaluartut.
- Akissarsiatigut toqqaannartumik unammilissanngitsugut soorunami neriuutigaara. Oqaannarpunga aaqqissuussinerup uuma atuutilernissaanut kommunit tamarmik ikoqatigiissasut, Kommuneqarfik Sermersuumi Borgmesterip sinniisussaa, Justus Hansen oqarpoq.
