Ilulissat Toqungasup timaa aalisartup qaqikkaa

Aalisartoq Ilulissat eqqaanni pingasunngornermi ningittagarsortilluni toqungasup timaanik qaqitsigami tupassimassagunaqaaq. Ilulissani politiit toqungasup timaa maanna tigusimalerpaat, kinaassusersiniarneqartussanngorlunilu. Sebastian Bech, Ilulissani politiini aqutsisoq, KNR-imut taama ilisimatitsivoq. 

- Toqungasup timaata misissorneqarnerani pinerluttoqarsimasinnaaneranik takussutissartaqanngilaq. Maanna kinaassusersiniarlugu misissuileruttorpugut, Sebastian Beck KNR-imut oqarpoq. 

Toqungasup timaata asiusimanera pissutaalluni, arnaanersoq angutaanersorluunniit suli qulakkeerneqanngilaq.

- Angutaanerali ilimasuutigaarput, Bech oqarpoq. 

Innuttaasut piffissami matumani aalisariarsimasunik ilisarisimasallit ernumassutissaqanngitsut, Sebastian Bechip oqaatigaa. 

- Toqungasup timaa sivisungaatsiartumik immamiissimanissaa nalilerpara. Ukioq ataaseq sinnerlugu immamiissimassasoq ilimagaara, Sebastian Bech oqarpoq. 

Toqungasup timaa inuit tammaaneqartut arlarisinnaaneraat, politiit ilaatigut misissorpaat.