Misissorparput Aalisakkat niaqui paperuilu tunisassiaasut
Tamannali piviusorsiortuunngitsoq alisakkanik tunisassiorfiit oqariartuutigaat.
Atugarissaarnerunissamut illusinissamullu akikinnerusumik taarsigassarsiniarnissamut akissaqalissaagut. Tassami aalisakkap aalisarneqartup 42 procentiinnaa tunisasssiarisarparput. Aalisakkat perlukui erlaviilu Nunatta karsiata millionerpassuarnik isaatitsissutigisinnaavai, Vittus Qujaukitsoq Kim Kielsenilu qineqqusaarnermi taama oqariartuuteqarput.
- Aalisakkap qaqinneqartup 42 procentiinnaa ullumikkut atorluartarparput, erlaviit niaqqullu igiinnartarpagut tunisassiarisinnaagaluakkagut igiinnartarlugit, Aningaasaqarnermut naalakkersuisuugallartoq Vittus Qujaukitsoq Ilulissani qineqqusaarnermini oqarpoq.
Qallunaat nunaanni inuussutissat pillugit ministereqarfiup kisitsisaatai malillugit Norgemi aalisakkat perlukui ukiumut 1,4 milliardit koruuninik isertitsissutaasarput. Norgemi aalisarneq tamaat ataatsimut isigalugu 11 milliardit koruuninik isertitsissutaasarpoq.
Nunatsinnili aalisakkanik tunisassiorfiit aalisakkat atorluarnerunissaannik oqalunneq ippinnartoqartippaat, tassami aalisakkanik atorluaaneq atugarigamikku.
- Qanga perlukut qimminut nerukkaatigisarpagut. Ullumikkulli qalerallit niaqui paperuilu Kinamut tunisarpagut, Henrik Leth, Polar Seafoodimi siulittaasoq KNR-imut oqarpoq
Polar Seafoodili kisiartaanngilaq aalisakkanik atorluaasoq. Niels Thomsen, Halibut Greenlandimi pisortaq oqaluttuarpoq qaleralllip tamangajaa tunisassiarineqarlunilu aningaasarsiutigineqartartoq.
- Qalerallit pingaarnertut tigoorarpagut. Qaleralik erlaveqanngitsoq ilivitsuutillugu tigusarparput. Aggoriarlugu niaqui paperuilu ilanngullugit avammut tunisarpagut, Niels Thomsen oqarpoq.
Aalisakkanik tunisassiorfiit aalisakkat perlukui erlaviilu aningaasarsiutaasinnaaneri qularaat. Assartuinermut periarfissat ajornakusoorput. Kiisalu perlukut erlaviillu tunisassiarinissaannut aalisakkanik tunisassiornerup iluani pissutsit allanngortinneqartariaqassammata.
Halibut Greenlandimi qalerallit erlavii pisisartunit soqutigineqarnersut malugineqanngilaq.
- Massakkoqqinnaaq aningaasarsiutaasinnaasutut isiginngilakka. Imatut oqaatigilara; aningaasarsiutaasinnaasutut isigisuugutsigit erlavii tamarmik tigooqqarsimassagaluarpagut, Niels Thomsen Halibut Greenlandimi pisortaq oqarpoq.
Royal Greenlandimi tunisassiornermut pisortap, Lars Nielsenip, Radioaviisimut aasaq oqaatigaa raajat qalipaannik sequnniliornermik ineriartortitsillutik, soorluttaaq qaleralik tamakkingajallugu tunisassiarisaritsik.
Vittus Qujaukitsoq oqaaseqartinniaraluaratsigu iluatsinngilarput. Siumullu siulittaasuata Kim Kielsenip, Danmarkimi maanna angalasup, SIK-p siulittaasua Jess G. Berthelsen innersuussutigaa, taannalu aamma oqaaseqartissinnaasimanatigu.
