Politikki

Aajap Aleqallu suleqatigiillutik eqqartuussiveqarnermi pissanngorsaanissaq sulissutiginiarpaa

Danskit aningaasanut inatsisissaat isumaqatiginiutigineqalerpat eqqartuussiveqarnerup pitsanngorsaaffigineqarnissaa Aaja Chemnitz Larsenip Aleqa Hammondillu piumasarissamaarpaat.

Allattoq Helle Nørrelund Sørensen

oktobarip 06-at 2015 11:34

Nutserisoq Erna Lynge

Københavnimi Kalaallit Illuutaanni Folketingimi politikerit ippassaq inuit 70-it missaaniittunut Folketingimi suliassaminnik nassuiaappaat.

Ataatsimiinneq pivoq Folketingip ammaanersiornissaa ullumik ataatsimik sioqqullugu.

Juunimili qinersineqareermat Folketingimut ilaasortat Kalaallit Nunaanneersut aatsaavissuaq sanileriillutik suliassatut takorluukkatik saqqummiuppaat.

Naallu suliniutissatut takorluukkat assigiinngissitaaraluartut politikerit taakku marluk aningaasanut inatsisissap isumaqatigiinniutigineqarnissaa pillugu isumaqatigiipput.

Aamma atuaruk ASSIT Folketingimi ammaaneq

Kalaallit Nunaanni eqqartuussiveqarneq pillugu suliassat marluullutik pingaartikkitsik Aleqa Hammond KNR-imut oqaluttuarpoq:

- Eqqartuussiveqarneq maanna ingerlanerluttoq sulissuteqarfiginiarparput. Aammali allarpassuaqarpoq. Kommunefogedit, isertitsiviit, parnaarussiviit, politiit sulinerat ikiaroornartorlu pillugu akiuiniarneq.

- Kalaallit Nunaanni eqqartuussiveqarnerup aaqqissuussaanera tamarmi nutaanik iseqarluni qimerloortariaqartoq, oqarlunilu Danmarkimisut pitsaatigilissasoq - soorlu naalakkersuisunngortitsinermi isumaqatigiissummi taama oqaasertaqartoq.

Aamma atuaruk Danmarkip Nunattalu peqatigiillutik kalaallit Danmarkimiittut ikiussavaat

Aleqa Hammond Aaja Chemnitz Larsenilu sapaatip akunnerani matumani inatsisinik atuutsitsinermut ministeri Søren Pind Kalaallit Nunaanni eqqartuussiveqarneq pillugu ataatsimeeqatiginiarpaat.

Tassanilu marluullutik danskit naalakkersuisui eqqaasinniarpaat, naalakkersuisunngortitsinerminni neriorsuutigisimammassuk tamanna pitsanngorsaaviginiarlugu.

Aaja Chemnitz Larsenimit sammissallugu pingaartinneqarpoq inatsisit 60-ikkornisat 70-sikkornisallu ullutsinnut naleqqussarneqarnissaat, innuttaasut eqqartuussiveqarnikkut eqqortumik pineqarnissaat qulakkeerniarlugu.

- Tamaat ataatsimut eqqartuussiveqarneq isigalugu isumaqarpunga amerlasuut ukiuni aggersuni suleqatigiissutigisinnaallugit, Aaja Chemnitz Larsen naggasiivoq.

Aappaagumut aningaasanut inatsisissaq Folketingimi oktobarip 22-iaani siullermeerneqassaaq.

Aamma atuaruk Aaja: Pituffik pillugu allagaatit saqqummiunneqartariaqarput