Aaja Chemnitz Larsenip Erfalasorput Bornholmimi erfalatikkaa

Arfineq aappassaat Folkemødeqartitsipput, folketingimullu ilaasortat atlantikup avannaaneersut isumaqarput Bornholmimi erfalasumik takutinnissaat pingaaruteqartoq.

- Kalaallit Nunaat Issittorlu politikikkut oqallinnermut ilanngunnissaat pingaaruteqartoq Aaja Chemnitz Larsen Inuit Ataqatigiinneersoq oqarpoq.

Bornholmimi illoqarfinnguami Allingemi ulluni sisamani Folkemødeqarnerani folketingimut ilaasortarpassuit, ministerit isumaqatissarsiortartullu imaaginnavissimapput.

- Taamaattumik oqartussaaffiit 32-it Kalaallit Nunaat sinnerlugu Danmarkip aallussaasa ukkatarinissaat pingaaruteqarpoq, eqqanaarniarlugu inuit politikkikkut oqallinnerminni aamma ilannguttassammatigit Aaja Chemnitz Larsen oqarpoq.

AAMMA ATUARUK Kalaallit Illuutaat Bornholmimi aasaru inuppassuit naapinneranni peqataassapput

Aammattaaq Savalimmiuneersumut Sjudur Skaalemut politikkikkut oqalliffimmiinnissaq pingaaruteqarpoq.

- Folkemøde tassaavoq festivali inuinnaat naalakkersueqataanerannut pingaaruteqartoq Sjudur Skaale oqarpoq.

Folketingimut ilaasortaq Savalimmiuneersoq oqallinnernut pingasunut ilaassaaq.

Sjudur Skaalemummi pingaaruteqarpoq Danmarkip, Savalimmiut Kalaallit Nunaatalu assigiinngissutaat Folkemødemi peqataasunut paasitissallugit.

- Neriuppunga Naalagaaffeqatigiinneq pingaartinneqarluni ima paasineqassasoq: ataqatigiinneq ingerlalluassappat danskinit paasineqartariaqarpoq Savalimmiut nuna allaammat, Kalaallit Nunaallu aamma allaalluni.

Taamaattumik Sjudur Skaalemut pingaaruteqarpoq Københavnimiit naalagaaffeqatit tamaasa aaqqiissutissanik naammasseriikkanik tunineqartannginnissaat.

 - Eqqaamajuarnissaa pingaarluinnartuuvoq  Kalaallit Nunaanni Savalimmiunilu inuinnaat naalakkersueqataanerisa ataqqineqarnissaat, Sjudur Skaale Jonas Fievémut taama oqarpoq.

AAMMA ATUARUK Innuttaasut Bornholmimi ataatsimiinneranni IA peqataavoq