Qimmeq Laika silaannarsuarmut ukiut 60-it matuma siorna aqqutissiuussivoq

Qimmerli pigineqanngitsoq, Moskvap aqqusernani nassaarineqartoq, rakettip avataarsualiartaatip Sputnik 2-p nunarsuatsinniit aallartinneqarnerani erngerluni toqusussanngortinneqarpoq.

Uumassusilerisoq, 90-inik ukiulik, Adilja Kotovskaja sovjetip avataarsualiartartui, Laikamut qimminullu allanut sungiusaasuusimasoq taama oqaluttuarpoq.

Qimmit toqqakkat aallartinneqarnissaminnut sukkassutsimut sungiussiniassammata akunnerpaalunni kaavititsivinnut aalajangerlugit nikinnaveerseqqatinneqartarput.

Kotovskaja naapertorlugu qimmit avataarsualiartussatut toqqakkat tamarmik arnaviaapput.

- Arnavissat quiniaraangamik nissumik illuat qangattaqqaartariaqanngimmatigit angutivissaniit inikinnerusumiissinnaammata toqqarpagut, Kotovskaja oqarpoq.

AAMMA ATUARUK Avataarsualiartartoq avataarsuanit qinersisoq

Laikap ulluni qulini uumasinnaanissaa neriuutaasimagaluarpoq, akunnialunnguilli qaangiutiinnartut satellitsip kissatsippallaarneranit panertoorpallaarnerminillu toqquteqarpoq.

Ruslandip oqaluttuaq eqqortoq 2002-mi aatsaat oqaluttuaraa. Laika ingerlalluarsimasoq aatsaallu toqunartutalimmik nerisinneqarnermigut toqusimasoq siusinnerusukkut oqaatigineqartarsimavoq.

Sovjetunionip inuk siulleq, avataarsualiartartoq, Jurij Gagarin apriilip aqqaneq-aappaani 1961-imi nunarsuarmut kaaviaartilerpaa.

AAMMA ATUARUK Kinamiut rumstationimik Nunarsuatsinnik kaaviiaartussamik aallartitsisut

AAMMA ATUARUK Ulloriaq angalasoq nunarsuatsinnut assingusoq ilisimatuut nassaarigaat