USA-mi qinersineq 2016 Avataarsualiartartoq avataarsuanit qinersisoq

Avataarsualiartartut NASA-meersut USA-mi qinerseqataassappata, tamanna piffissaagallartillugu piareersarneqartariaqarpoq.
Assi © : NASA/Flickr Creative Commons
Allattoq Ritzau
novembarip 08-at 2016 17:02
Nutserisoq Simon Uldum -

Amerikamiut qinersiniarlutik qinersivinni ullumi siuleriaatsiterlutik utaqqerrapput, Shane Kimbroughili namminerisaminik qinersiveqarpoq.

Avataarsualiartartoq 49-nik ukiulik Nunat Tamalaat Avataarsuani Misissuisoqarfiannut (ISS) aallartitaavoq, tassaniinnermilu USA-mi præsidentimut qinerseqataavoq.

NASA inuit attaveqaqatigiittarfianni Tumblrimi taama allaaserisaqarpoq.

Kimbroughillu qinerseqataanissamik aalajangernera imaaliallaannarluni pisimanngilaq. Tamannami iluatsinniassappat piffissaagallartillugu piareersarneqartariaqarpoq.

Avataarsualiartartummi qinersinerit sorliit peqataaffigissanerlugit aallarnissani ukiumik ataatsimik sioqqullugu ilisimatitsissutigisariaqarpaa, NASA taama allappoq.

Texasimi politikerit 1997-imi aalajangiinerisigut avataarsualiartartut najukkami nunalu tamakkerlugu qinersinerni peqataanissaat aqqutissiuunneqarpoq.

Avataarsualiartartullu David Wulfip siullersaalluni periarfissaq taanna ukioq taanna atorpaa najukkami qinersisoqarnerani qinerseqataalluni.

Præsidentinngorniuuttut tassaapput Demokraatineersoq Hillary Clinton illuatungeralugu Republikanerineersoq Donald Trump.

Clinton, Trump tullersoriniagaallu ullumi marlunngornermi qinersereerput.

Clintonip ajugaanissaa ilimanarnerpaasoq qinersisartunik isumasiuinerit arlallit takutippaat, Trumpili  isumalluarpoq.

- Ajunngeqaaq, qinersiartortilluni maannamut tusarsimasani pillugit tusagassiortumit aperineqarami taama akivoq.

/ritzau/