34-nik ukiulik pinngitsaaleeriarsimasutut nakuusersimasutullu eqqartuunneqarluni paarineqartussanngorpoq
Angut 34-nik ukiulik Maniitsumeersoq piffissami killiligaanngitsumi paarineqartussanngorlugu Qeqqata Eqqartuussisoqarfiani eqqartuunneqarpoq.
Kalaallit Nunaanni Politiit tusagassiutinut nalunnaarummi taama paasissutissiipput.
Nakuusernerit arlallit angummut 34-inik ukiulimmut unnerluussutigineqarput, suliami annermik pineqartoq tassaavoq Maniitsumi Esbjergip Aqqutaani apriilip 14-iani ukioq kingulleq pinngitsaaleeriarsimanera peqqarniitsoq.
Sakkortuumik nakuusernikkut, taamani arnamik 25-nik ukiulimmik qungasikkut tigumminnilluni timaatigut niaquatigullu isimmittaalluni, pinngitsaaleeriarsimasutut pisuutinneqarluni angut eqqartuunneqarpoq.
Pisut ingerlanerani angutip arnaq nammieersinnaajunnaarsillugu pinngitsaalillugu uffartissimavaa, piffissallu ingerlanerani arnaq inissiamit qimaasinnaasimavoq.
Unnuallu ingerlanerani angut imerniartarfimmiitsilluni akunnerup affaata ingerlanerani inunnut sisamanut nakuusereerluni aatsaat tigusarineqarpoq.
Pinerlunnerit pereersut isiginiarneqarput
Suliami unnerluussisup Alexander Stürupip eqqartuussiviup aalajangiinera iluarisimaarpaa.
- Pinerluttulerinermi inatsimmi paarineqartussanngortitsineq pineqaatissiissutit sakkortunersaraat. PIneqartoq piffissami killiligaanngitsumi paarineqartussanngortinneqarpoq, tarnip pissusaanik nalilersuinerit angutip allanut navialisitsisinnaajunnaarneranik oqaasertallit aallaavigalugit iperagaanissaa eqqartussivimmit aatsaat aalajangerneqarsinnaavoq, taanna oqarpoq.
Tarnip pissusaanik misissuinerit sukumiiisut aallaavigalugit, unnerluussisussaatitaasut piffissamik killiligaanngitsumik pineqaatissiisoqarnissaanik piumasaqartarput.
Kingornalu suliaq nakorsanut eqqartuussinerni siunnersortaasartunut ingerlateqqinneqartarpoq. Taakkulu unnerluutigineqartup allat inuunerannik, timaannik, peqqissusaannik nammineersinnaanerannilluunniit navialisitsisinnaanerata ilimanaataa aallaavigalugu paarineqartussanngortinnissaata pisariaqassusaa nalilersortarpaat.
Unnerluutigineqartup piffisap ingerlanerani pinerluutigisimasai suliami aamma isiginiarneqarsimasut, unnerluussisussaatitaasoq Alexander Stürup nassuiaavoq.
- 2009-miilli arfineq-marloriarluni inunnut nakuusersimasutut eqqartuunneqarsimavoq, taakkulu katikkaanni ukiuni arfineq-pingasuni Pineqaatissineqarsimasunut Inissiisarfimmiittussanngortinneqarsimalluni. Angutillu inuunerinnerulersinnani Maniitsumi angalaaleqqinnginnissaannik eqqartuunneqarnera, politiinit unnerluussisussaatitaasunillu naammagisimaarparput, taamma oqarpoq.
Eqqartuussut angutip 34-nik ukiullip Nunatta Eqqartuussisuuneqarfianut suliareqqitassanngortillugu ingerlateqqippaa. Angut suli tigummigallarneqarpoq.
