Meeqqat illersuisuat: Oqalliseriaaseq meeqqanut inuusuttunullu aamma sunniuteqarpoq
Politikkikkut oqallinnermi pissusilersornerit kusananngitsut, Aviâja Egede Lynge isumaqarpoq.
Taamaammat tamanna uparuarnissaa pingaartippaa, kusananngitsumimmi pissusilersorneq inersimasunuinnaanngitsoq sunniuteqartarmat.
Inersimasut pissusilersornerat meeqqanit ilaarneqartarpoq. Taamaammat inersimasut politikkikkut oqallinnerminni pissusilersornerat nikanarsaarinnippalaalerpat, meeqqanut kinguneqartitsisinnaasoq, Meeqqat Illersuisuat, Aviâja Egede Lynge isumaqarpoq.
Inersimasummi kusananngitsumik pissusilersorpata, meeqqat taamaasiornissartik ajorsorissanngikkaat, Aviâja Egede Lynge isumaqarpoq.
- Inersimasut pimmatiginnittarneri nakkarsaasarnerilu isumaqatigiinnginnernit aallaavillit meeqqat inuusuttullu pissusilersornerannut aattuuttarpoq. Meeqqat maligassiuisui, inersimasut, perorsarsimalluartumik oqallissinnaanngippata, naatsorsuutigissanngilarput meeqqat iluminni aaqqiagiinnginnitik pitsaasumik aamma aaqqissinnaassagaat, Aviâja Egede Lynge tusagassiuutinut nalunaarummi allappoq.
Inersimasut iliuusaat meeqqat inuusuttullu atuarfimmi, angerlarsimaffimmi sunngiffimmilu iliuusaannut sunniisartut Aviâja Egede Lyngep uparuarpaa.
Taamaammat Meeqqat Illersuisuata kajumissaarutigaa, atuarfinni tamat oqartussaaqataanerat oqallittarnerlu qulequttatut qaqittaqqullugit, atuartullu sungiusarlugit ataqqinnippalaartumik inooqatigiinnissaannik. Aamma isumaqatigiinngikkaluarluni.