Siunnersuisoqatigiit Naalakkersuisut periusissiaat nalornissutigaat

Pisortat ingerlataqarfiinik nutarterikkut 650 millionit koruuninik sipaaruteqarnissaq Naalakkersuisut kissaatigaat. Tamannali qanoq iliornikkut pissanersoq Naalakkersuisut nassuiaatigeqqissaanngimmassuk, angunissaa ajornakusoorsinnaasoq, Aningaasaqarnermut Siunnersuisoqatigiit isumaqarput
- Tamanna imaaliallaannaq anguneqarsinnaanngilaq, Aningaasaqarnermut Siunnersuisoqatigiit siulittaasuat, Torben M. Andersen oqarpoq.

Naalakkersuisut napatitsinermut siuariartortitsinermullu pilersaarutaat malillugu siunissami isertitat aningaasartuutillu nikingassutaannut matussusiinissamut 2030-imi 1 milliard koruuninik pissarsiortoqassaaq. 

Pisortat ingerlataqarfiinik nutarterineq pilersaarummi pingaaruteqarnerpaajuvoq. Nutarterinerlu allaffissornikkut pitsanngorsaanikkut ilaatigut pissaaq, taamaalillunilu pisortat 650 millionit koruuninik 2030-mi sipaaruteqassapput.

Anguniagarli annertooq qanorpiaq anguneqassanersoq, Naalakkersuisut suli nassuiaatiginngilaat.

- Aamma anguniakkamut naammassinninnissamut piareersimanani suliamik aallartitsisoqarsinnaanera aarlerinarsinnaavoq, Torben M. Andersen oqarpoq.

Anguniagarlu piviusorsiortuugaluartoq piviusunngussappat pisortat ingerlataqarfiini allannguerujussuartoqartariaqartoq, Aningaasaqarnermut Siunnersuisoqatigiit erseqqissaatigaat.

Tamatuma saniatigut peqqinnissaqarfimmut anigaasartuutit ikilisinneqarnissaat ajornakusoortorujussuussasoq, siunnersuisoqatigiit isumaqarput, nakorsartinnissamut atortorissaarutinik nutaanik akisuunillu saqqummertoqarajuttarnera pissutigalugu.

- Taakkununngalu aningaasaliissutissat 650 millionit koruunit saniatigut nassaarineqartariaqassapput, Torben M. Andersen oqarpoq.

Pisortat ingerlataqarfiinit 650 millionit koruuninik sipaaruteqartoqarsinnaanera piviusorsiortuusoq, aningaasaqarnermut naalakkersuisoq, Randi Vestergaard Evaldsen, isumaqarpoq.

Aningaasalli suminngaanneerpiaq nassaarineqassanersut nassuiarsinnaanngilaa.

- Uagut Inatsisartuninngaanniit Naalakkersuisuninngaanniillu kisitta suliaq paarinngikkipput isumaqarpunga. Pisortanut komuninut inunnullu ataasiakkaanut una attuumassuteqartoq oqarusuppunga. Taamaammat eqqarsartariaatsikkut allannguineruvoq, kisianni pisariaqarluinnarpoq, Aningaasaqarnermut naalakkersuisoq, Randi Vestergaard Evaldsen taama oqarpoq.

Nunatta aningaasaqarnerata pitsaanerulertinnissaa Naalakkersuisut ilungersuutigigaat naalakkersuisup aamma oqaatigaa, missingersuutinullu inatsit innersuussutigalugu.