Amerikap nunavittaani pissartanngorniunneq Nuummi ingerlanneqassaaq
Amerikap nunavittaani assammik arsartartut kattuffiata Buenos Airesimi ippassaq ataatsimiinnerani inisimatitsisussamut taasinermi Nunatta 17-init taaneqarnerata kingorna tamanna paasinarsivoq. Chile arfineq-marlunnit taaneqarpoq.
Pissartanngorniunneq 2018-ip aasaani junimi ingerlanneqassaaq.
Kurt Lauritsen Kalaallit Nunaanni Assammik Arsartartut Kattuffia sinnerlugu Argentiinami ataatsimiinnermi peqataavoq.
Nunattalu ingerlatsisuunissamut taaneqarneranut suna pissutaanersoq aperaarput.
- Kalaallit Nunaata amerikap nunavittaani pissartanngorniunnerni peqataajuaannangajannera unammilluaqataasarneralu pissutaagunarput. Inuillu Kalaallut Nunaannukarusupput tamaanilu assammillu arsarneq takorusullugu. Nuummilu pissartanngorniuttoqassaaq, tassanimi kisimi timersortarfinnik annernik marlunnik peqarpoq, unamminerillu amerlasussaammata taakku pisariaqartinneqarput, Kurt Lauritsen oqarpoq.
Iligiit aqqaneq-marluk tallimariarlutik siulliusunik unammissapput, ullullu qulit ingerlaneranni ajugaanniutivinnermut anngunniarsarissallutik.
Iligiillu nunarsuarmi pitsaanersaat ilaanniittut arlallit, soorlu Brasilia, Argentina, USA, Canada immaqalu Cuba, peqataassapput.
Kurt Lauritsinnilu Nuummi pissartanngorniunnissaq qanoq aningaasaliiffigineqassanersoq aperineqarami ima akivoq.
- Aningaasaliiffigineqarnissaa ajornarunnaarsinniarlugu timmisartumik attartugaqarniarpugut. Timmisartup arsartartut Mexicomeersut imaluunniit Panamameersut aassavai Kangerlussuarmukaateriarlugillu Nuummukartissallugit. Peqataanermut akiliut nunanit ataasiakkaanit akilerneqassaaq, timmisartullu attartonnissaa Kalaallit Nunaanni Assammik Arsartartut Kattuffiata, nunat tamalaani assammik arsartartut kattuffiata, IHT-p, amerikallu nunavittaani assammik arsartartut kattuffiata, PATHF-ip, ataatsimoorlutik akilissavaat. 10 millionit koruuninut missingersuuteqarpugut, taamaammat aningaasanik amerlanernik pissarsisariaqassaagut, Kurt Lauritsen oqarpoq.
Arctic Winter Gamesillu aaqqissuunneqarluarnera Kalaallit Nunaanni Assammik Arsartartut Kattuffiata pissartanngorniutsitsinissamut qinnuteqarniarneranut pissutaaqataavoq.
- Kisianni aamma Namminersorlutik Oqartussat, Kalaallit Nunnaanni Timersoqatigiit Kattuffiat, Elite Sport Greenland Kommuneqarfik Sermersoorlu Nunatsinni angisuunik aaqqissuussisoqarnissaanik kajumissaaruteqarput. Aamma nunanut allanut unammisartugut nunarsuarmi pissartanngorniunnissamut anngussinnaasoraagut, Kurt Lauritsen oqarpoq.
2018-imi pissartanngorniunnerup Nunatsinni assammik arsartartunut piginnaasalinnut piumassuseqarnerulertitsinissaa aamma neriuutaavoq.
- Arsartartut sungiusalereersimanissaat neriuppugut. Pissartanngorniunnissamut qaammatit pingasuinnanngortullu sungiusalertoqarsinnaanngilaq, ukiulli arlallit sioqqullugit sungiusalereertoqartariaqarpoq. Aallartereersimassasoraagulli, Kalaallit Nunaanni Assammik Arsartartut Kattuffianneersoq, Kurt Lauritsen KNR-imut oqarpoq.
