Alapernaarsuut "Vædderen" tikaagullimmut aportoq
Sakkutuut umiarsuaaraat alapernaarsuut ”Vædderen” tikaagullimmit aporneqarsimannguatsiarluni maanna Islandimi amutsivimmiippoq.
Umiarsuaq tikaagullimmit aporneqarsimappat, tikaagullik aportoq maanna toqusimassasoq ilimagaara, tikaagullinnik immikkut ilisimasalik Carl Christian Kinze naliliivoq.
- Tikaagullimmik apugaqarsimassanerluta naluarput, kisianni tikaagulliit ippassaammalli qanittuararsuullutik ingerlaartut takussaapput. Qipoqqaq meterinik tallimaannarnik ungasitsigaluni saneqquttoq ataasiarluta aamma takuarput, alapernaarsuummi aquttuuneq Klaus Bolving Fyenimi aviisip tusagassiortuanut oqaluttuarpoq.
Nunap Isuata kujataani apuisoqarpoq umiarsuullu anguutaa nikissinnaajunnarluni equtinneqarluni.
- Tikaagullik umiatsiamit sukkasuumik aporneqarsimaguni toqusimassagaluarpoq. Tikaagullik sakkortuumik aporneqaraangami toqusarpoq, tamanna kialuunniit nalunngilaa. Aamma imaassinnaavoq tikaagulliup annertuumik ikilerneqarsimanera pissutigalugu aarluit saassukkaat, Carl Christian Kinze oqarpoq.
