Nunaqarfiliartaataasinnaasunik misileraapput

Royal Arctic Bygdeservice-mik ukiortaamit Pilersu-isup ingerlatsilernissani piareersaleruttorpaa.

Tamatumunnga atatillugu Pilersuisumi pisortaaneq Gerhardt Petersen ulluni makkunani Savalimmiuniip-poq angallammik misileraajartorluni.

Angallat misileraneqartoq qangatut angitiginngilaq sukkatiginanilu. Isikkanik 45-nik angissuseqarpoq 20 aamma 22 knob-it akornanni sukkassuseqarluni, arfineq pingasuk 10 tonsillu akornanni usisinnaassuseqarpoq aqqaneq marlunnillu ilaasoqarsinnaalluni.

- Ilaasartaataasinnaaneri periarfissiissutiginiarparput, naluneqanngitsutut ilaatigut nunaqarfinnit illoqarfinnut aquuteralannik angalasoqartarpoq, immaqalu sila pitsaavallaanngitsoq angalasoqartarluni. Taamaattumik periarfissarsiuussivugut. Arctic Umiaq Linemut attuumassuteqanngitsumik taama suliaqarpugut. Gerhardt Petersen nassuiaavoq.

Aamma oqarpoq, angallatit misilerakkatik nunatsinnut piukkunnaateqartut qanoq akilissanerlugit isumaqatigiinniarnerit aallartikkumaartut, taakkulu ulluni qaninnerpaani pisinnaassasut.

- Aki unamminartoq soorunami pissarsiariniarparput, taamatuttaaq akilersinnaasumik ingerlasinnaanera paasissallugu pingaarnerpaammat nalilersuissaavut. Gerhardt Petersen oqarpoq.

Tallimanik pisinissaq eqqarsaatigineqarpoq. Taakku kujataani, qeqqani, avannaani Uummannami Upernavimmilu inissinniarneqarput. Angallat ullumi misilinneqartoq Savalimmiuni atorneqarpoq, pitsaasunik misilittagaqarfiusoq pisortaaneq Gerhardt Petersen oqarpoq.