Meeqqanik ilaqutariinnillu sullissisut, tassalu isumaginnittoqarfimmi, peqqinnissaqarfimmi, kulturikkut ilinniartitaanikkullu ingerlatsisoqarfimmi sulisut, pinaveersaartitsinermi siunnersorti aamma ulluunerani paaqqinniffinni sulisut ulluni marlunni isumasioqatigiinnerat naammassivoq.
Ilaqutariit qitiutillugit ulluni marlunni isumasioqatigiinnermit siunnersuusiarineqarsimasut ullumi saqqummiunneqassapput. Ilaqutariinnik ajornartorsiutilinnik ulluinnarni sullissisut qanoq ilillutik pitsaanerusumik sullissisinnaanertik oqaluuserereerlugu siunnersuusiorsimapput.
Ilaqutariinnut peqqissutsimullu naalakkersuisoq Inuit Ataqatigiinneersoq Asii Chemnitz Narup isumasioqatigiissitsinissamut qaaqqusisuusimavoq. Sullissisut meeqqanut ilaqutariinnullu sullissinerminni tunulequttatik apeqqutaatinnagit pitsaanerusumik qanimut suleqatigiissinnaanissamut siunnersuuteqarsimapput, iliussissatullu pilersaarummik suliaqarsimallutik.