Nunatta nunanut avannarlernut ilaasortaanera aappaagu ukiunik 20-ngortorsiussaaq. Nunani avannaamioqatigiinni ilasortaaneq nunatsinnut ilinniarfiullunilu pingaaruteqarsimasoq naalakkersuisunut ilaasortap Josef Motzfeldtip oqaatigaa.
- Namminersornerulersimanitta inatsisaa isigissagaanni nunanut allanut politikkeqarnissamut malitarisassanik amigaateqarsimavoq, taamaammat nunanut avannaamioqatigiinnut ilaasortaaneq suleqateqarnerlu nunanut allanut nunatsinnit politikkeqarnissamut aqqutaasimavoq pingaarutilik ilinniarferujussuarlu.
Nunarput ukiuni 20-ni ilaasortaanermigut, soorlu nunat baltiskit siuarsarnerannut sunniuteqarsimasoq Josef Motzfeldt isumaqarpoq.
- Nunat avannaamioqatigiit nunanut baltiskinut ineriartortoqarnissaata avatangiisillu eqqumaffigineruneqarnissaannut nunarput nunanut avannaamioqatigiinnut ilaasortaanermigut peqataavoq, maannalu iliuuserisassatta tulleraa Ruslandip avannaata kitaani mingutsitsinermut tunngasut, Josef Motzfeldt oqarpoq.