Aalisakkanik Tunisassiornermik Ilinniarfimmi ATI-mi, Maniitsumiittumi, ilinniartut taamaatiinnartartut, siornamut sanilliullugu, 30 procentimik ikileriaateqarsimapput. Taamaatiinnartartut ikileriarsimanerannut arnarsiamik atorfinitsitsimaneq pingaarnertut pissutaasoq, Ilinniarfimmi pisortap tulliata Ole Lennert Poulsenip oqaatigaa:
- ATI-mi neqeroorutigisinnaasatta amerlinerat, pingaartumillu arnasiamik atorfinitsitsisimanerput, isumaqarluinnarpugut maaniikkusunnerunermut apeqqutaasut. Taamaatiinnartarnerlu ajornartorsiutitut isigalugu eqqummaariffigineqarnera iliuuseqarfigineqartarnera pissutaaqataavoq.
Louise Petersenip, arnarsiatut sulinini ima oqaluttuaraa:
- Ullaakkut arfineq-marlunut itersaallunga aallartittarpunga. Atuariartoraangata piareersaateqartarpunga, soorlu majuartarfiit asanneqarnissaat agguataartarlugit. Ilinniartut taama aaqqissuussineq nuannarisorujussuuaat, oqaloqatiginissaannut aamma periarfissaqartarama, ajornartorsiuteqarpata angerlarserpataluunniit.
Louise Petersenip, ilinniartut 31-t ullakkut makinnissaat isumagisarpai. Qaammatillu naanissaanut nerisassaqarnissaat ilinniartut peqatigalugit isumagisarlugu.
ATI-mi ilinniartup, Arnannguaq Frederiksenip 21-nik ukiullip aaqqissuussineq iluarisimaarpaa:
- Ullaakkut iterniartarninnut iluaqutigisorujussuuara. Nerisassiornermullu nalornigaangama aperisarlugu, kollegiatsinnullu iseraangat oqaloqatigillattaartarlugu.
Ilinniaqataa, Nuka Berthelsen 32-inik ukiulik, isumaqarpoq taama aaqqissuussineq pitsaasuusoq.
- Nukarliunerusut, aatsaat angajoqqaaminninngaanniit qimaguttut eqqarsaatigalugit, isuma pitsaasuuvoq.