Kommunit atortunik pisiniassagunik avatangiisinik ajoqusiinngitsunik qiniataariinnarsinnaanngorput.
Borgmesterit atorfilittallu KANUKOKA-p nittartagaanut www.kanukoka.gl-imut isiinnarlutik avatangiisinut tunngasumik meqqit pillugit paasissutissanik pisinnaanngorput. Taakku saniatigut avatangiisit sianigalugit pisiniartarnissamut kommunit politikkissaannut siunnersuut, attaveqarfiusinnaasullu arlallit takuneqarsinnaassapput.
KANUKOKA-p siulittaasua Jens Lars Fleischer oqarpoq, kommuneqarfiit kattuffiannit suliniut, Qorsussiorit-mik qulequtsigaq, nunatsinni avatangiisip illersorneqarnissaata tamanit akisussaaffigineqarneranik aallaaveqartoq. Pinngortitap saligaatsuutinneqarnissaa soqutigigaanni nioqqutissianik avatangiisinut nanertuutaanngitsunik pisiortorneq apeqqutaasarpoq, siulittaasoq oqarpoq, neriupporlu innuttaasut kommunillu paasissutissat atorluartarumaaraat.