VIDEO Great Greenland sulisut sisamat soraarsinneqarput

Maannamut sulisunit 33-usunit sisamat allamik suliffissarsiortariaqassapput, suliffissarsiortariaqalersussallu amerlanerulersinnaapput. Ammerivimmi sulisut sutortarfiat, marlunnik sulisulik, oktobarip naanerani matuneqassaaq. Aamma mersortarfimmi sulisut marluk suliunnaarsinneqassapput.

- Suliffeqarfik sunaluunniit, suugaluartorluunnit, aningaasatigut isertitsinngippat soorunami tassa pisariissaasariaqarpoq, tunitsivimmi mersortarfimmilu pisortaq Preben Møller KNR-imut oqarpoq.

Aamma atuaruk VIDEO Great Greenland sulisuminik ikilisaavoq

Ukioq kingulleq amigartooruteqarneq allatut isikkoqarsimasinnaagaluarpoq, suliffeqarfiup suleqatigisimasaminik North Atlantic Fur Group-imik eqqartuussivimmut suliassanngortitsinerminit 32 million koruunit piumasani pisimasuuppagit. Isertitassat sussakkeerneqarsimasut isertitarisimasuugaanni ukioq kingulleq 2,6 million koruuniinnaat amigartoorutigineqarsimassagaluarput.

- Ukiorpassuarni angusimanngisatsitut ukioq manna amigartooruteqanngitsumik aniguinissatsinnut qanitsuararsuuvugut. Taanna nuannaajallannartuuvoq. Akiligassallit ikilisaasuupput, pisortaq Lars Berg upernaaq KNR-imut taama oqarpoq.

Immikkoortortani tamani allaffeqarfimmilu

Maannali allatut inissisimalerput. Suliffeqarfik Naalakkersuisunit 15 million koruuninik aningaasaliiffigineqarnikuuvoq, taamaakkaluartorli sipaarniartoqarlunilu naleqqussaasariaqalersimapput.

- Taamaammat pisariillisaallutalu naleqqussartariaqalersimavugut. Taamaaliorpugut immikkoortortatsinni tamani allaffeqarfimmilu, pisortaq maanna oqarpoq.

Sulisulli qassit suliunnaarsinneqassanersut Lars Bergip oqaatigisinnaanngilaa.

- Tamanna oqaaseqarfigisinnaanngilara. Akornatsinni paaseqatigiilluartoqarpoq malitassat malillugit ingerlavugut sulisullu ilisimatinneqarluarsimapput, Great Greenlandip pisortaa oqarpoq.

Aasaq amminik akitsorterussisoqarnerani tunisaqarpiannginnerup kingorna Lars Bergip sulisut amerlassusaat naleqqussartariaqalersimavai.