Kattusseqatigiit Partiiat: Erngup akia assigiinngippallaarpoq
Kalaallit Nunaat imermik mikinngitsumik atorluarneqarsinnaasumik qallersimaneqarpoq, Kattusseqatigiit tusagassiuutinut allagaqarlutik taamatut allapput, sermersuarmillu pisumit imermik avammut tunisassiorsinnaanerup atorluarneqarsinnaanera siunnersuutigalugu.
Imeq iluaqutigalugu nukissiuutinik sanaartorsinnaaneq partiimit atorluaqquneqarpoq.
Kalaallit Nunaata sineriaani illoqarfinni assigiinngitsuni erngup akiata assigiinnginnerujussuat Kattusseqatigiinnit uparuarneqarpoq, assigiimmik akeqartitsinerup atorunnaarsinneqarnerata kingorna.
Assersuutitut taaneqarpoq, Qaanaami imeq kubikmeterimut 34 kroneqarmat, Paamiunilu imeq kubikmeterimut taamaallaat 5 kroneqarluni. Akit assigiinnginnerujussuat pillugu qanoq iliuuseqartoqarnissaa Kattusseqatigiinnit piumasarineqarpoq.
