Sinerissatsinniit, KNR 16.02.2019

Sinerissatsinniit ilanngutassiat takutippagut.

Qeqertarsuarmi lokal TV, tassa Arfivik TV ukiunik 25-inngortorsiortoq, suleqatitta Pauli Wille alakkarpaa.

Qasigiannguani Avannaata Qimussersuaqarnissaanut sukkaniuteqataasussat kisimik piareersanngillat, aaqqissuisulli aamma ulappuseruttortut, Randi Broberg ilanngutassiarai.

Suliffeqarfiit kommunillu akornanni suleqatigiinnerup pitsaasuunissaa anguniarlugu, Qeqqata kommunia siullermeersumik suliffeqarfiit pisortaannik aqutsisuinilllu ilasseqatigiissitsivoq.

Qeqqata Kommuneani inuussutissarsiornermut siunnersuisooqatigiit Arctic Circle Business Maniitsumi
ineriartornermut suleqataarusullutik suliffeqarfinnik ilaasortassarsiorput. Suleqaterput Karl Davidsen Maniitsumi tamannarpiaq ilanngutassiaraa.

Nanortalimmi utoqqaaqqat peqatigiiffiat 1991-mi martsip pingajuani pilersinneqarnikoq ullumikkumut allaat suli ornigarluarneqartarpoq.

Tamakkuupput una sapaatip akunnerani allakaatissinnaasagut. Sapaatip akunnera tulliani marlunngornermi aallakaatitseqqikkumaarpungut.

Neriuppungut una sapaatip akunnera naalluarumaarissi.

Qujareerluta,
Sinerissatsinniit aaqqissuisut.

Isummersuutit