Maajimi peqqissuugit aamma nerisassanut tunngasinnaavoq. Pisiniarfimmi ilinniartup Louise Berthelsenip pisisartut naatitanik qanoq atuitigisarnerat paasisaqarfiginerujumallugu naatitaminernik misileraasitsivoq naatitallu peqqinnartuunerat oqaluttuarisarlugu, inuillu piumagaangata apeqqutinik akisassaannik allatsilaartarlugit. Nunatsinni uuliasiorniarneq pillugu isumasioqatigiinneq Taseralimmi ingerlanneqarmat peqataasut ilagaat Qaasuitsup kommuneani Aatsitassarsiornermut ataqatigiissaarisoq Hans Peder B. Christensen, taassumalu oqaluttuaraa 2010-mi uuliasiorluni qillerisoqarmat Aasiaat umiarsualivittut atorneqarnerani sullissineq qanoq ingerlasimanersoq. Aamma Siumup inuusuttai Sisimiuni isumasioqatigiikkamik inatsit tunngaviusoq aammalu nunatsinni aatsitassarsiorniarneq paasisassarsiorfigaat isumasioqatigiissutigalugillu.