Saammaasseqatigiinnissamut isumalioqatigiissitaq paasititsiniaalersoq
Saammaasseqatigiinnissamut isumalioqatigiissitap tv-kkut paasisitsiniutaa KNR-TV-kkut sapaatip akunnerani matumani isiginnaartartunut siullermeerluni takutinneqassaaq.
- Paasisitsiniummik saqqummiiniarluta Isumalioqatigiissitami ataatsimiinnitsinni siullermi aalajangerpugut, isumalioqatigiissitap sulinera taamaalilluni paasineqarlunilu ersarinnerussammat, Jens Heinrich oqarpoq.
Siammasissumik inuiaqatigiinnik peqataatitsiniartut
Isumalioqatigiissitap suliaani inuiaqatigiit aallaavigineqarput, taamaattumik siamasissumik inuiaqatigiinnik peqataatitsineq pisariaqarpoq. Soorlu aamma sulinerput pillugu nittartagaliorsimasugut, radiukkut apersuinertigut aviisinillu saqqummersitsilluta.
Isumalioqatigiissitaq Ánorâq film suleqatigalugu TV-koorusiorpoq, taanna nipilersoqatigiit Nanookikkut nipilersugaanik nipitalerlugu KNR-TV-koortinneqartassaaq, aamma nittartakkami www.saammaatta.gl-imi takuneqarsinnaavoq.
Paasisitsiniut minutsinik tallimanik sivisussusilik Ánorâq film suleqatigalugu piviusunngortinneqarsimavoq, nipilersuullu nuannarineqaqisunit Nanook-unnit nipilersuusiarineqarluni.