Nunatsinni innuttaasut ikiliartuinnavipput
Tassa imaappoq, Nunatsinni innuttaasut ukioq 2040-mi 3000-it missaannik ikilisimanissaat ilimagineqarpoq, tassa Nunatsinni kinguaassiornerit, nunasinerit nuuttarnerillu tungaasigut ilimagisamik allanngortoqariataanngippat innuttaasut 3000-inik ikinnerulersimanissaat naatsorsuutigineqarluni.
Taassuma saniatigut innuttaasut ataatsimut isigalugu ukioqqortunerulissapput, tassami innuttaasut agguaqatigiissillugit ukiui ullumikkut 35,4-pput 2040-milu tamanna 38,1-nngorsimassangatinneqarluni. Danmarkimut naleqqiukkaanni tamanna appasinnerulaassaaq, Danmarkimimi innuttaasut ullumikkut ukiui agguaqatigiissillugu 41,1-iupput.
Aamma atuaruk Nunatsinniit aallartut pillugit nalunaarusiaq
Utoqqaallu 70-it sinnerlugit ukiullit taamanikkussamut marloriaatinngorsimanissaat aamma naatsorsuutigineqarpoq.
Innuttaasut sulisinnaasutut ukioqassutsimikkut inissisimasut ikileriarnissaat aamma naatsorsuutigineqarpoq, taamaattorli sulisinnaasut innuttaasut affaasa missaat missigissagaat aamma naatsorsuutigineqarpoq.