Naartusut marluugaangata aappaa naartuersittarpoq

Naartusut marluugaangata aappaa naartuersittarpoq. Nuummi Dronning Ingridip Peqqissaaviani arnat napaataannut nakorsaq Atugagdliutinut taama oqarpoq.

Nunatsinni illersuuteqarani atoqateqartarnerit amerlavallaartut piffissami sivisuumi ilisimaneqarpoq.

Nappaatipiluit soorlu syfilis, gonorre klamydialu sukkasuumik tuniluuttarput, illersuuteqaranili atoqatigiinnerit kinguaassiuutitigut nappaatipiluinnarnik kinguneqartanngillat.

Naartulernerit amerlasuut kissaataaneq ajorput peersitsinermillu kinguneqartarlutik.

AAMMA ATUARUK Peqqinnissaqarfik: Illersuuteqaratik atoqatigiittartut amerlavallaarput

- Kalaallit Nunaanni naartuersittarnerit ullutsinni katillugit ukiumut 800-t missaaniittarput; kisitsisit taakkua ukiumut inunngortartut amerlaqatigingajappaat. Tassa imaappoq naartusut marluugaangata ataaseq naartuersittarpoq, peqqissaasoq Stine Brenøe Atuagagdliutinut oqarpoq.

Taassuma ilinniarnerminut atatillugu apeqqutit immersuilluini akisassat atorlugit arnat naartusut 37-t misissuiffigisimavai. Arnat quliugaangata arfineq marluk siornatigut kissaatiginngisaminnik ataasiarlutik arlaleriarlutilluunniit naartoreersimasartut akissutit paasinarsisippaat.