”Ujarassiorit” ukiut 26-ssaanni maanna ingerlanneqarpoq

Ukiup ingerlanerani innuttaasut nunatsinni piniariarnerminni pisuttuarnerminniluunniit ujaqqat nassaarisatik nassiussinnaavaat.

Ungasinngitsumilu inuutissarsiutinut, sulisoqarnermut, niuernermut nunanullu allanut naalakkersuisoqarfimmi ajugaasoq saqqummiunneqarpoq.

Laura Jensen Narsami najugaqartoq unammisitsinermi Ujarassiorimmi akissarsiassaq annerpaaq eqqorpaa, 55.000 koruuninik akissarsitinneqarluni.

Laura Jensenip Narsap avannaani Eqaluit Iluanni ujaqqat aatsitassartallit qaarsumeersut nassaarisimasaasa misissorneqarnerisigut paasinarsivoq 3-4%-imik zinkimik, 0,3 %-imik aqerlumik aamma tonsimut 500 gramimik molybdenimik akoqartut.

- Aasat tamaasa ujaqqanik katersisarpugut, umiatsiamik angalaartilluta nunamulluunniit igaasariartilluta ujarassiortarpugut meeqqavullu ujaqqat suuneri suminngaanneernerilu pillugu oqaluttuuttarlutigit, Laura Jensen oqarpoq.

Ukiormanna aappaattut akissarsiassaq 25.000 koruuninik naleqartoq, Saqqameersumit Dina Jensenimit pissarsiarineqarpoq.

Taassuma ujaqqat Saqqap eqqaaneersut aligortaqarlutillu sulfidenik aatsitassartallit nassaarisimavai, ujaqqat akoraat 26% zink, 8% aqerloq siilvilu tonsimut 80 gram.

Marluk pingajuusutut akissarsitinneqarput immikkullu 10.000 koruuninik akissarsitinneqarlutik.

Arsummiit Ejnar Jakobsen ujaqqamik qaarsumeersumit sulfiditalimmik nassaarsimasoq. Ujaqqarak nassaarisaa kanngussammik 0,9%-imik kuultimillu tonsimut 0,1 gram-imik akoqarpoq.

Pingajuattut akissarsisup aappaa Qaarsormiuuvoq, Akaaraq Hansen, ujaqqamik agatimik Qaarsut kitaaneersumik silineqarluni kusanartutut pinnersaasiarineqarsinnaasumik nassiussaqartoq.

Sisamat 5.000 koruuninik immikkut akissarsitinneqarput, tassalu:

Nuummiu Peter Lynge Petersen, Nuup kujammut kangiani Ameraliup paavani molybdænglansimik nassaartoq.

Sisimiormiu Hans Peter Lennert, ujaqqamik aligoqqiinik akoqartartumik kimberlitimik Kangerluarsuup Ungalliup paavani nassaartoq.

Kullorsuarmiu Tobias Danielsen, ujaqqamik hæmatitsimik 63%-imik savimminermik akulimmik Kullorsuup eqqaani Saarliani nassaartoq.

Kuummiormiu Hans Sanimuinnaq, ujaqqamik agiarmik savimminissartarlimmik Tasiiliap Illoqqortoormiullu akornanni Kangerlussuup kangiani nassaartoq.