”Nissimaaq nissimaajaqqallu” inassutigineqarput
Kalaallisut meeqqanut atuakkiaq ” Nissimaat nissimaajaqqallu” Nunat Avannarliit Killiit Siunnersuisoqatigiiffiata meeqqanut inuusuttunullu atuagassiatigut nersornaasiuttagaannut 2006-imi toqqarneqarsinnaasunngorlugu inassutigineqarpoq.
Atuagaq Grethe Guldagerimit allanneqarsimavoq Nuka Godtfredsenimillu titartagartalersorneqarluni.
- Nunatsinni ileqqutoqqat nunanilu assigiinngitsuni pisartut atuakkiortup tulluussarneqarsinnaasunngorlugit ersersippai. Atuakkanik naliliisartut inassuteqarnerminni ilaatigut taama allapput.
Atuakkami oqaluttuarineqarpoq, nissit Kalaallit Nunaanni najugaqartut atortutigut pigisanik pingaartitsinngitsuusut, ulluinnarni allanngoriartuutaasinnaasunik soqutiginnittuusut kiisalu pillangajaalaarnermik nuannaartitsinermillu nuannarisaqartuusut.
Atuakkat allat nersornaasigassanngorlugit inassutigineqartut tassaapput: Savalimmiunit ”Qimmeq, qitsuk aamma teriaq” kiisalu Islandimit ”Isikkat qerrunnikut ”.
Aggustimi 2006-imi nersornaasiisoqassaaq.
