”Maaniippugut” Qaqortup Katersugaasiviani saqqummersinneqalersoq

Ole Poulsenip saqqummersitaani Qaqortup ilisarnaatai, kulturi timersornermilu naleqartitagut tulluusimaarutissagullu takutinniarpai, assillu Olemut pingaaruteqaqaat.

Qaqortumi Katersugaasiviup pisortaa Vivian Andersen taama allappoq.

Assit sammisaqartut Kulturip iluani, soorlu timersornermi ullorsiornernilu pisimasuupput.

Ole Poulsenip, 52-inik ukiullip Qassiarsummeersup, 1978-imilu Qaqortumut nuussimasup, Qaqortumi assilisai 100-it Qaqortup Katersugaasiviani decemberip tallimaaniit januarip 21-ata tungaanut saqqummersinneqassapput.

Assit 60-it missaaniittut siullermik saqqummersinneqassapput, sapaatip akunneri marluk qaangiuppata assit sinneri saqqummersinneqassallutik. Saniatigut assit aalasuliat aamma sarsuatinneqartassapput

Saqqummersitsisup siullermik aalasulianik suliaqarluni nuannarisarisarivaa, assammillu arsarluni 1992-imi GM-ertoqarnerani filmilioqqaarsimavoq, pimoorullugulu 2007-imi assiliisalerluni.

Saqqummersitsinermi filmit immiussat ullumimiit januarip 21-ata tungaanut takuniarneqarsinnaalissapput.