”Ice Cold Gold” nuannarineqarluartoq
Aallakaatitassiaq qallunaatut "Det iskolde guld"-imik taaguuteqarpoq, kalaallisut "Kuulti nillertoq", Katuamilu filmertarfimmi ippassaq unnukkut takuteqqaarneqarmat inuppassuit isiginnaariarput, tassa Nunatsinni takuteqqaarneqarnera isiginnaaramikku.
Aallakaatitassiami nangeqattaartumi amerikamiut kuultisiullammassuit arfineq-pingasut Nuup Kangerluani Qeqertarsuarmi malinnaavigineqarput.
Sermeq aakkiartuinnavissoq nalunngilaat, nunalu siornatigut misissuiffigineqarsimanngitsoq misissuiffigivaat.
Kuultisiortut taakku arfineq-pingasut ilaat USA-mi naalagaffeerartik qimassimanngisaannarpaat, Nunatsinnullu angalaarnerat misigissutsinik qaffakaatitsivoq. Nunatsinnukartup ataatsip Nunatsinnukannginnermini talimigut kalaallisut oqaaseqatigiinnik kakkiortissimavoq, oqaatsit "Silarsuaq kisimi naalagaavoq" takussaallutik.
"Ice Cold Gold" USA-mi apriilip 21-ani takuteqqaarneqarpoq, immikkoortut aallaqqaammut arfiniliupput, filmiliortuatali David Caseyp neriuutigaa suli amerlanernik aallakaatitassiorsinnaassallutik.
Aallakaatitassianut nangeqattaartunut nutaanut allanut naleqqiullugu "Ice Cold Gold" nuannarineqarnerusimasoq, Kurt Tondorf, Animal Planetimeersoq, Radioaviismut oqarpoq.
Kuultisiortut taakku arfineq-pingasut kuultisiorsinnaanissamik Aatsitassanut Pisortaqarfimmit soorunami akuersissuteqarput.
Pinngortitami misigisat, silarlulaarneratalu amerikamiunit pikkunanaarneqarnera quianartutut soorunami aamma isigineqarsinnaavoq, aallakaatitassiarli amerikamiunit nuannarineqartussatut suliaammat tamanna immaqa paasinarsinnaavoq. Nunattali avammut nittarsaalluarneqartoq qularutissaanngilaq.
