”Aalajangersimasumik akikitsut" iluatsilluarput

Pisiniarfeqarfiit annersaat 65-inik pisiniarfiutillip nioqqutigisani 300-t ulluinnarni atugassatut nioqqutaatini, ”Aalajangersimasumik akikitsut”, iluatsitsivigilluarpaa.
Assi © : KNR
Allattoq Simon Uldum -
oktobarip 21-at 2013 06:14

- Pisisartut agguagarsiassaminnik utaqqinatik akikitsorsinermi sipaagassatik naatsorsortariaaruppaat. Nioqqutini taakkunani akigititarput allanngorartinnagu ullut tamaasa aki assigiiginnaatipparput. ”Aalajangersimasumik akikitsut”-nit nioqqutaativut pisisartutta tigulluarlugit nioqqutini taakkunanni 10 procent angullugu tunisaqarnerput qaffariarpoq, KNI-mi nioqqutissarsiniarnermi pilerisaarinermilu pisortaq Kurt Lauritsen oqaluttuarpoq.

Nioqqutini pineqartuni safti, qaqorteqqasut kinertuliassat, qajuusat pizzalu pisiariumaneqarnersaapput.

KNI-p ”Aalajangersimasumik akikitsut”-ai nunatsinni atuisut 22.000-inut ikkutivillutik ikkupput: Nioqqutit taakku ulluinnarni atugassatut pisiarineqartartut saqqummiunneqarmatali pisiniarfinni 65-ini nioqqutit taakkorpiaat tunineqartarnerat 10 procentimik qaffappoq.

- Tamanna isumaqarpoq pisisartutta akip allanngorarani taannaaginnavinnera iluarisimaaraat – agguagarsinissaq eqqaallattaasariaqanngilaq imaluunniit akikitsorsinermi sipaakkat naatsorsortariaqanngillat. Nioqqutit pineqartut ataasiinnarmik allanngoranngitsumik akeqartippavut – ataasiinnarmik imaluunniit 1.000-inik pisiguit, KNI-mi nioqqutissarsiniartarnermi pilerisaarinermilu pisortaq Kurt Lauritsen oqarpoq.

”Aalajangersimasumik akikitsoq”-mik isumassarsiaq Danmarkimeersuuvoq, tassa suliffeqarfissuup pisortaa Claus Jensen-ip isumassarsiani qallunaat pisiniarfeqarfissuani angisuumi ilutsittumik ingerlannikuuaa. Periutsimi isumaavoq nioqqutit ilaanni kaaviiaartitsineq qaffariarlugu nioqqutissarsiniartarfinnut pisiniarnermi akimik pitsaanerusumik angusaqartoqarsinnaanera – taamaalilluni nioqqutit ilisarnaatillit nioqqutiginerini allaat 45 procent tikillugu akikillisaasinnaaneq periarfissinneqarsinnaalluni.

- Pisisartutta periuserisarput nuannaarutigaat. Tassami ilaatigooriarlutik allanik inuulluataarnarnerusunik pisisarsinnaanertik akissaqartinnerulissavaat, KNI A/S-mi nioqqutissarsianiartarnermi pilerisaarinermilu pisortaq Kurt Lauritsen oqarpoq.

Najoqqutarisaq ”Aalajangersimasumik akikitsut” sumiikkaluaruit Pilersuisup pisiniarfiini tamani atuuppoq. Najoqqutarisami assigiinngitsorpassuit nioqqutaapput, qaqorteqqasut, qajuusat, issingigassat kiisalu qillertuusarmiut eqqiaatillu. Pisiniarfinni ”Aalajangersimasumik akikitsut” qorsunnik allagartalersuutinik ilisarnaasersorneqartarput, allagartarsualiarineqatarlutik kiisalu akiat ilisivinni qorsummik aamma ilisarnaateqartarluni.

- Pisisartut akikinnersiorlutik nioqqutit taakkorpiaat aviisini neqeroorutinik ujartorlugit utaqqeqqaartariaajunnaarpaat, ukiormi kaajallallugu nioqqutit taakku ”Aalajangersimasumik akikitsut” nalunngilaat. Amerlasuut nuannaarutigisarpaat, aammami ulluinnarni sukkanerusumik pisiniarfilerisinnaanertik iluarisimaaramikku, Kurt Lauritsen oqarpoq.