“3900 Nuuk” tusarnaartartunit soqutigineqarluarpoq
DR-ip juullimut nangeqattaartuliaa "3900 Nuuk" danskit amerlasuut juullimut qiortaanerminni mamakujuliornerminnilu naalaartarsimaqaat.
Aallakaatittakkat agguaqatigiisillugu ullut tamaasa inunnit 63.000-init naalaarneqartarsimapput, tamannalu P1-ip aallakaatittagaasa naalaartartuisa agguaqatigiissinnerinit annertuneruvoq.
Kisitsisit DR-imeersut naapertorlugit danskit naalaartartut 350.000-it nangeqattaartup immikkoortuisa 24-usut ilaat ataaseq tusarnaarsimavaat.
Kisitsisit assuarnaatsuupput
DR-imi tusagassiuutit pillugit ililisimatusarfimmi pisortaq Dennis Christensen naapertorlugu taakku amerlapput:
- Aallakaatitassiat sananeqarneri eqqarsaatigigaanni kisitsisit assuarnaatsuupput, Dennis Christensen KNR-imut oqarpoq.
Aallakaatitassiani immikkoortut tamarmik atuakkiortumit Niviaq Korneliussenimit aallaqqaaserneqartarput, malitseqartarlutillu nuummiunit naliginnarnit imminnut ilisaritittunit.
Naallu immikkoortut tamarmik oqaluttuamik nutaamik sammisaqartaraluartut, ajornakusoortuaannarpoq naalaartut nangeqattaartunut tusarnaartigiinnarnissaat.
Uanili iluatsilluarpoq.
Naliginnaasumik tusarnaartartuniit amerlanerit tusarnaar
"3900 Nuuk" decembarimi danskit P1-imi radiokkut naalaartaartut 7 procentiisa tusarnaartarsimavaat, agguaqatigiisillugu tusarnaartut 6 procentiusaraluartut.
Nittartakkamittaaq amerlasuut malinnaasimapput. Aallakaatittakkat 22.000-eriarlutik aaneqartarsimapput. Tassanili naalaartartut qassiuneri nalileruminaappoq:
- Ilisimanngilarpummi 22.000-eriarlutik aallernerit aamma taama amerlatigisunit tusarnaarneqarsimanersut imaluunniit arlaata aariarlugu ilaquttani tamaasa tusarnaaqatigisimanerai taamaalillutillu naalaartut amerlanerullutik. Tamannali ilisimanngilarput, Dennis Christensen oqarpoq.
Nittartakkatigut aallernerit sumerpiaq pisimanersut ilisimaneqanngilaq, Kalaallit Nunaanni Danmarmikimiluunniit, DR nalunaarpoq.
DR-illi nittartagaatigut, imaluunniit KNR-ip nittartagaatigut aallugu suli nangeqattaartuliaq tusarnaarneqarsinnaavoq.
