’Qaqqat Alanngui’ Paamiuni takorusunneqaqaaq
Soqutiginnittut naatsorsuutigisamit amerlanerunerat peqqutaalluni ’Qaqqat Alanngui’ Paamiuni unnugu marloriarlugu naggammik takutinneqartussanngorpoq.
Allattoq Louise M. Kleemann
septembarip 01-at 2011 12:53
Tumit Productions naapertorlugu filmip Paamiuni arfinileriarlugu takutinneqarnissaa pilersaarutaasimavoq, unnugu nalunaaqutaq arfineq-marlunut naggammik takutinneqartussaasimalluni.
- Kisianni isiginnaariat naatsorsuutigisamit amerlanerusussanngornerat ullaaq paasivarput, taamaattumik filmimik takutitsiqqinnissaq nalunaaqutaq 21.30 pisussanngorlugu aaqqissuutipallapparput, filmimik ilitsersuisoq Malik Kleist tulluusimaaqisoq oqarpoq.
Paamiuni innuttaasut 500-t missaasa ' Qaqqat Alanngui' takoreerpaat, tassa illoqarfimmi innuttaasut sisamaraarterutaat sapaatip akunnerani uani filmeriarsimallutik.
Tumit Productions naapertorlugu filmip Kujataani Avannaanilu takutinneqarnissaa piareersarneqaleruttorpoq.
