’Misissuinermi inerniliussat akerlileruminaapput’

Misissuinermi inerniliussat akerlileruminaatsuusut Gemba Seafood, KNAPK sinnerlugu misissuisimasoq, isumaqarpoq.

Sulisitsisut Peqatigiiffianni pisortap, Henrik Lethip, kisitsisit illuatungileraluarpai.

Raajat Kalaallit Nunaanneersut Canadameersullu Danmarkimut tunineqarneranni akiisa Gemba Seafoodimit misissuataarneqarneranni pissutsit assigiinngitsut ilaatinneqarsimanngitsut, Henrik Leth KNR-imut ippassaq oqarpoq.

Jens Henrik Møller, Gembameersoq ima akivoq:

- Nioqqutissiat allattorsimaffimmiittut misissuinitsinni tunuliaqutaraavut. Allattorsimaffik taanna kikkunnilluunniit alakkarneqarsinnaavoq atorneqarsinnaallunilu. Piviusut tunngavigalugit allatorsimaffiusimappat, taava taakku atuuttussaapput. Allat namminneq allattorsimasuuteqassappata, paasissutissat taakku tunuliaqutaralugit GA misissuisitsisinnaavoq, Jens Henrik Møller oqarpoq.

Nioqqutissiat nunat tamalaat akornanni tunisassiarineqartartut allattorsimaffimmut tassunga ilanngunneqartarput, tamarmik immikkut normulersorneqartarlutik.

Kisitsisit misissuinermi tunngaviginiarneqartut piviusorsiortuunnginnerannik Sulisitsisut Peqatigiiffiata oqariartuutaa ilumoortortaqannginnerami?

- Soorlu oqareersunga kisitsisit pisortatigoortumik saqqummiunneqarnikut misissuinermi tunuliaqutarivavut. Siunnersortitut namminersortutut ingerlavugut, tassalu misissuisarfittut namminersortutut periarfissarput taannatuaavoq. Taamaammat misissuinerup tatiginassusaa apeqquserneqarsinnaanngilaq, Jens Henrik Møller oqarpoq.

Kisitsisit apeqquserneqassappata, taava allatut misissuisoqartariaqassasoq, taassuma erseqqissaatigaa.

Gembap KNAPK-mut arlaannaatigulluunniit attuumassuteqannginnera aamma erseqqissaassutigaa:

- Apeqqutaanngilaq kina imaluunniit kikkut misissuisitsisuusimanersut. KNAPK-p GA-lluunniit misissuisitsinera assigiimmik inerneqarsimassagaluarpoq, Jens Henrik Møller, Gemba Seafood Consultingimeersoq oqarpoq.