Inuussutissarsiutit Kulturi Nunanit allanit

’Homo Sapienne’ tallimanik uummataasalerneqartoq

Kalaallip inuusuttunnguup, Niviaq Korneliussenip atuakkiaa, 'Homo Sapienne', Danmarkimi pitsaalluinnartumik allaaserineqarpoq. Aviisip Politikenip allaaserisamini qulequtsiuppaa, 'Kalaallit inuusuttut nipaat kamattoq'.

Allattoq Apollo Jeremiassen, Sara K. Jakobsen

novembarip 20-at 2014 12:51

Aviisimi allaaserinnittup, Jes Stein Pedersenip isumaa malillugu, atuagaq 'Homo Sapienne' kikkunnit tamanit atuarneqartariaqarsoraa. Niviaq Korneliussenilu assersuullugu, taalliortumut aamma inuusuttumut, Yahya Hassanimut, taassuma taalliaasa saqqummersinneqarnerani Danmarkimi kikkunnit tamanit tupaalaatsisorujussuartumut.

Jes Stein Pedersenip allaaserisamini nersualaarinnippoq oqarluni, atuakkiap allanneqarnerani oqaluttuartut arlallit atorneqarsimasut oqaatigalugu atuarlugu kina oqaluttuarnersoq sivisuatsiaamik aatsaat atuareerlugu paasisassaasoq.

Aamma atuaruk Kalaaleq inuusuttoq atuakkiaminik saqqummersitseqqaalerpoq

- Atuagaq atuarlugu kingusinnerusukkut aatsaat paasinarsivoq inuusuttut qasserpiaat oqaluttuarnersut. Jes Stein Pedersenip aamma allaaseraa, 'Homo Sapienne'-p atuakkiarineqarnerani atuakkioriaaseq immikkooruteqarluinnartuusoq allalluni atoqatigiinneq pillugu allaaserisat isertuunnagit allagaasoq.

Niviaq Korneliussenip atuakkiia 'Homo Sapienne', ima pingaaruteqartigaaq allaat, allaaserinnittup aviisip saqqaanut ilineqarnissaa pisariaqartissimallugu.

Aamma atuaruk VIDEO Atuakkiortup inuusuttup atuakkiaqqaatini quppeqqaaraa

- Niviaq Korneliussenip atuakkiiani siullerpaami, tarnikkut annernartut oqaluttuarai aamma oqaluttuaralugit aninguineq, avissaarneq saammaasseqatigiinnerlu, tassa taamaammat atuakkiaq siaruarterneqartariaqarpoq, Jes Stein Pedersen allappoq.

Niviaq Korneliussenip atuakkiia, 'Homo Sapienne', allaaserinnittumit tallimanit uummataasalerneqarpoq, tassa pitsaalluinnartutut nersualaarlugu. Politikenimi atuakkiat pitsaalluinnartut arfinilinnik uummataasalerneqartarput.