Nunani allamiut issittumi aningaasalersuinissaq pilerngukkaat
Nunat Avannarliit Aningaasalersuisarfittut Aningaaseriviat - Den Nordiske Investeringsbank - nunanit avannarlernit nunanillu Baltikumimiittunit pigineqartoq, ukiortaap kingorna 500 millionit euronik - tassalu 3,8 milliardit koruuninik - Issittumi aningaasalersuinissamut immikkoortitsisimavoq.
Aningaasallu taakku ilaatigut Kalaallit Nunaanni ineriartortitsinerup sukkatsisarnissaanut atorneqarsinnaasut, Nunat Avannarliit Aningaasalersuisarfittut Aningaaserivianni sullissinermut pisortap Søren Mortensenip oqaatigaa.
- Kalaallit Nunaannut tunngatillugu, immaqa uanga Danmarkimeersutut - - Kalaallit Nunaannut sapinngisamik annertunerpaamik iluaqutissanngortinnissaat kissaatigaarput.
NIB-ip aningaasalersuiffigisassatut soqutiginerusai tassaapput Issittumi atortulersuutit nalunaarasuartaatitigullu attaveqaateqarnermut suliniutit. Taakkulu aningaaserivinnut taarsigassarsititsinikkut aningaasalersorneqassapput, aningaaseriviit suliffeqarfinnut taarsigassartitsinerminni qularnaveeqqusiinerat allissammat.
Aamma atuaruk Aningaasaateqarfeqarnissamik siunnersuuteqarnissaq Randip naatsortuutigaa
Nunatsinni aningaasalersukkat ikitsuinnaasut
NIP-li Issittumut immikkoortissimasaminit Nunatsinni suliniutinut suli aningaasalersuisimanngilaq.
Aamma inuussutissarsiornerup ineriartortinneqarnissaanut aningaasaateqarfik, Vækstfonden, Nunatsinni aningaasalersuinermik suliniummut ataasiinnarmut peqataasimavoq (HHE A/S-ip piginnittuisa nikinnerannut atatillugu), aningaasaateqarfik taanna aamma siorna aasakkulli Nunatsinni Savalimmiunilu aningaasalersuinissamut aningaasanik immikkut immikkoortitsisimavoq.
Tamanna aamma Europami Aningaasalersuisarfittut aningaasaateqarfimmut atuuppoq, taannami Qaqortorsuup eqqaani ingerlatseqatigiiffiup Hudson Ressourcesip anorthositimik piiaavianut maannamuugallartoq aningaasalersueqataavoq.
Aningaasalersuinerit ikitsuinnaanerinut aatsitassat akiisa apparsimanerisa kingunerisaanik Kalaallit Nunaata soqutigineqarpallaarunnaarsimasinnaasoq, Søren Mortensen NIB-meersoq isumaqarpoq.
Aammali Nunat Avannarliit Aningaasalersuisarfittut Aningaaseriviata ilisimasaqarfigineqarpallaannginneranik pissuteqarsinnaavoq. Aamma naalakkersuinermik suliaqartut tungaannit, taakkumi aningaasalersuisoqarsinnaaneranut periarfissat pillugit ilisimasanik siammartereqataasussaagaluarmata.
- Immaqa piffissanngorpoq politikerinut erseqqissaatigissallugu aningaasalersuisarnitsinni Kalaallit Nunaat isiginiarnerullugu aningaasalersuinissamut soqutiginnittugut, NIB-mi sullissinermut pisortaq oqarpoq.
Aamma atuaruk Aningaasaliissuteqarnissamik kissaateqarnissaq Løkkep utaqqivaa
Pisortat aningaasaataat sallersaasariaqarput
NIB-ip qanoq periarfissaqartitsilluni ilisimatitsisarnissani pikkoriffigivallaarsimanngikkaa Søren Mortensenip nassuerutigaa. Taamaammat aningaaserivik Nunatsinnut paasititsiniaalluni ukiaru angalanissaminik aamma pilersaaruteqarpoq.
Kalaallit Nunaannili aningaasalersuisoqassappat, kalaallit politikerit aningaasalersuinissamut tunngatillugu sallersaanissaminnut sapiissuseqarnerusariaqarsorai.
- Akiliisinnaassuseqarpugut. Aningaaseriviilli tassaassanngillat mittarfimmik tallilerinissamut allanullu tunngatillugu naammattumik uuliaqarneranik imaluunniit naammattunik aatsitassaqarneranik nalornissuteqartuusussat. Taamaammat aamma pisortat tungaannit ilaatigut qularnaveeqqusiinissamut piumassuseqartoqartariaqarpoq, NIB-ip sullissinermut pisortaa oqarpoq.
Aningaasalersuisarfittut ingerlatseqatigiiffimmi Greenland Venture A/S-imi pisortap Karsten Høyip nunanit allanit soqutiginninnerup alliartornera maluginiarsimavaa.
Piffissarli ungasinnerusoq eqqarsaatigalugu aningaasalersuinissamik isumaqatigiissutit ukiuni arlalinni inissinniartariaqarsinnaasartut oqaatigaa.
Nunatsinnili aalajangiisartut suliniutinut isumalluarnerusariaqarnerat isumaqataaffigaa, taamaaliornikkut nunani allani aningaasalersuisarfittut ingerlatseqatigiiffissuit peqataanissaminnut sapiissuseqalissammata.
- Aamma Nunatsinni suliffeqarfiit, aallartisaasut suliffeqarfinnilu pisortat namminneerlutik suliniuteqartariaqarput ingerlatsinissamullu pilersaarutinik pitsaasunik inerisaallutik. Isumalluarnermimmi takutitsisinnaanissarput aamma pingaaruteqarpoq. Nunaniimmi allanit isigaluta tamanna pingaartutut isigineqartarmat
Transportkreditfonden juulip aallaqqaataa aallarnerfigalugu Nunatsinni suliniutinut taarsigassarsisitsisalerniarpoq, aamma Pension Danmark nunanilu tamalaani aningaasalersuisarfittut ingerlatseqatigiiffissuaq Guggenheim Partners Issittumi aningaasalersuinissamik kissaateqarlutik oqaatigisimavaat.