Øystein Slettemarkip Finlandimiut sungiusaqatigai
Sisoraatinik ujakkaarluni arpattartoq Øystein Slettemark ukiumut tulliuttumut unammisaqattaarnissamut piareersarnermini aallartilluarpoq. Qanittumi Sisimiut eqqaani sisoraatinik sukkaniulluni unamminermi Arctic Circle Race-mi pissartanngortumit Jonas Olsen-imit aggersarneqarluni, Finland-imiut sisoraatinik nunanut allanut unammisartuisa sungiusarlutik København-imiinneranni Øystein Slettemark sungiusaqataavoq.
Allattoq Louise M. Kleemann
maajip 13-at 2008 07:02
- Kiassuup ataani silagissuarmi takisuumik arpappugut, arsaalluta, sisoraatinik assakaasuaralinnik ujakkaarluta, nalunnguarluta nukkassarlutalu, Øystein Slettemark allappoq.
- Sungiusariaatsinik nutaanik sungiusarneq uannut pingaarneruvoq, nunarsuarmi sungiusaasunik pikkorinnerpaat ilaannik sungiusaasoqarluni, nunarsuarmilu ujakkaallaqqinnerpaanik sungiusaqateqarluni kajuminnarpoq, Øystein Slettemark unnersiorpoq.
Uajkkaarluni sungiusakatalissaguni timersuummik allarluinnarmik misiliivoq tassalu iputersorlumi sungiusarneq. Stephan Mølvig 2004-imi olympiade-mik pissanngortanngortoq iputersornermik sungiusaavoq sungiusariaatsinillu misilittaalluni.
Iputersorneq takorluukkamit ilungersunarneruvoq Øystein Slettemark naggasiivoq.
