Øystein Slettemark VM-inut marlunnut peqataassaaq
Øystein Slettemark sungiusarluarsimalluni Italiami Martellemut ullumi aallassaaq. Unammiuaarnerit peqataaffigisai kingulliit tassaapput Norgemi pissartanngorniuunnerni 15 km-inut fri teknikkimi sukkaniiuunneq.
-Norgemi angutit ujakkaartartut amerlasuupilussuummata peqataassagaanni anngunniuttoqaqqaartarpoq, ikinnerpaamillu FIS pointinik 150-inik katersisimanissaq piumasaqaataalluni. Sukkaniuunnernut aalajangersimasumik amerlassusilinnut peqataanikuunnginnama FIS-imut allattorsimaffimmiinngilanga, taamaattorli qinnuteqaateqarnikkut peqataanissannut akuerineqarpunga. Sungiusaqqammeriarama piareersimasutut misiginngilanga, taamaammat unamminissamut aqaguttoq eqqissisimaaqqaarpunga ullormilu unammiffiusussaq nalliummat piareersimasutut misigalunga. Ujakkaartartut allat 140-t peqatigalugit ingerlaarfikkut maniilakulattukkut imaannaangitsukkullu 3x5 km-inut sukkaniuuteqataavunga. Sukkaniuunnermi ajugaasuuvoq Norgemi pissartaasoq Martin Johnsrud Sundby, taanna aamma ukioq manna World Cupertoqarmat fri stilimi ajugaasuuvoq. Sukkaniuteqataanera naammagisimaarpara, ajugaasoq minutsinik 4.52-inik inulaarlugu apuuppunga FIS pointinillu 123-it pissarsillunga, Øystein Slettemark oqaluttuarpoq.
Sisorartartup nunatsinneersup sukkaniuteqataanera pitsaanerpaarsuunngilaq, ullulli 14-it qaangiuppata sisoraaserluni ooqattaasarluni VM-ertoqarnissaanut februaarillu naanerani ujakkaarluni VM-ertoqarnissaanut piareersaataalluarpoq. Slettemark maanna Italiamut ingerlaarpoq, tassani meterinik 1600-nik portussusilimmi sukkaniuuttoqassaaq. Portusserlu pissutigalugu aami cellii aappalaartut amerlisassavai februaarillu tallimaata tungaanut ilungersuuterujussuanngikkarluarlugu sungiusassalluni. Øystein Slettemark Martellimi februaarip aappaani IBU-cupimut peqataassaaq.
-Sisoraaserluni ooqattaasarluni VM-ertoqarnerani februaarip qulingiluaani 10 km.-inut sukkaniuuteqataassaanga. Taava februaarip 14-iani 20 km-inut sukkaniuuteqataassaanga Val di Fiemmemi ujakkaarluni VM-ertoqarnissaanut piareersaatitut, tassungalu februaarip 20-iani anngunniuttoqarnissaa pilersaarutaavoq. Ingerlalluassaguma 15 km-inut fri stilimi sukkaniuunnermut februaarip 27-iani peqataasinnaanissara neriuutigaara, Øystein Slettemark oqarpoq.
