Øystein Slettemark olympiademut peqataasussanngorpoq
Sisoraatinik ooqattaasarluni unammisartoq Øystein Slettemark ukiuunerani olympiadeqarnissamut peqataasussatut toqqarneqarpoq. Ukiukkut olympeademik unammineq Canadami aappaagu ingerlanneqassaaq.
Allattoq Jaaku Lyberth
Danskit timersoqatigiivisa kattufiata Danmarks Idrætsforbundip ukiuunerani olympiademi unammersuarnissamut peqataasussat tallimat toqqarpaat.
Øystein Slettemark Kalaallit Nunaanni ujakkaarluni sisorartartut kattuffianni Grønlands Biathlon Forbundimi ilaasortaavoq, taannalu danskit timersoqatigiiffisa kattuffiannut Danmarks Idrætsforbundimut ilaasortaavoq, kattuffik taanna naalagaaffeqatigiinneq sinnerlugu olympiadeqarnissamut piareersaqataasussatut ataatsimiititaliaavoq. Ukiukkut olympiademik unammineq ingerlanneqassaaq aappaagu ukioq 2010-imi februaarip ulluisa 12anit 28ata tungaanut Canadami Vancouverimi.