Øystein Slettemark: OL-imut anngukkama nuannaarutigeqaara

Norgimi Trondheimimi World Cup-ernermi angusani tunuliaqutaralugit Øystein Slettemark OL-imut suli anngussinnaavoq. OL-imut peqataasinnaanissamut Danmarkip piumasaqaatai sekundinik 30-nik qaangerlugit Slettemark apuuppoq.

- Naak aput aqitsoq ingerlaarfigissallugu nakerinngikkaluarlugu, ingerlaarfissamik kaajallaaniarnera ajunngitsumik ingerlavoq. Sisoraatikka iluamik pujassarsimanngitsut aamma malugaara. Taamaakkaluartoq ujakkaartartut uannit sukkanerukkajuttartut malissinnaallugit misigisimavunga, Øystein Slettemark oqarpoq.

Ingerlaarfissaq Trondheimimiittoq qummukajaanik ulikkaarpoq, sisuffissanillu ulikkaarluni. Ingerlaarfissaq ajornakusoortoq.

- Ajugaasoq minutsinik marlunnik sekundillu 30-nik inuinnaraluarpara, ooqattaasarninnili sisamariarlunga uniuinikka pissutigalugit normu 92-itut inissippunga. OL-imulli anngunnissamut piumasaqaatit angugakkit nuannaarutigeqaara. Aamma World Cup-ertarnernut aappaagu peqataasarsinnaanissara qulakkeerpara, Øystein Slettemark oqarpoq.

Michael Greiss, Tysklandimeersoq, Trondheimimi World Cup-ertoqarnerani ajugaasuuvoq, Norgiminngaanneersorlu Ole Einar Bjørndalen tullersortaalluni.