Øystein Slettemark OL-imi peqataassaaq

Øystein Slettemark ukiuunerani OL-eqarnissaani qaammatip tulliani Canadami Vancouverimi ingerlanneqartussami unammeqataasussanngorpoq. OL-imi unamminermut peqataasinnaanermut periarfissaq kingulleq atorlugu Øystein Slettemark annguppoq. Taanna nuannaaqaaq oqiliallaqqallunilu:

-OL-imi unammeqataanissara ukiorpassuit siunertarisimavara anguniagaralugulu. Tamanna sorsuutigisimavara angunissaalu upperisimallugu, maannakkullu unammeqataanissara akuerineqarluni uppernarsarneqarpoq, nuannaaqaanga oqiliallaqqallungalu Øystein Slettemark oqarpoq.

Ukiuunerani OL-mi unammeqataanissamut Danmark imaluunniit Kalaallit Nunaat sinnerlugu Øystein Slettemark unammeqataassanersoq aperigatsinni ima akivoq:

-Misigisimavunga Kalaallit Nunaat sinnerlugu Olympeade-mi unammissallunga. Sisorarluni pissartanngorniuttarnerit Kalaallit Nunaanni aallartipput, World Cup-ini pissartanngorniuttarnermi Kalaallit Nunaat sinnerlugu unammeqataasarpunga , Kalaallit Nunaanni Sisorartartut kattuffiat pissartanngorniuttarninni tuualiaqutaasarpoq, taamaattumik Olympead-imi unammileruma Kalaallit Nunaat uummatinniissaq Øystein Slettemark oqarpoq.

Ukiuunerani OL-eqarnerani unammiuaarnerit qaammatip tulliani, februaarimi Canadami Vancouverimi aallartuissapput. Øystein Slettemark inuunermini qaqugutigoortumik misigisaqassanerarpoq, sapinngisanilu tamaat angusarissaarniarpoq, tamannalu siunertarivaa, angusassamik aalajangersimaqqissaartunik angusaqarnianngikkaluarluni.

Øystein Slettemark OL-imi unammeqataasinnaannera ullumi akuersissutigineqarpoq, Østrig-imi World Cup-imi unamminerup kingorna.