Østrigimiu Nuuk Marathonimi ajugaavoq

Nuummi ullumi silagissorsuuvoq, inuppassuillu aneerlutillu aliannaarsaartut ilimanarpoq, ilaallu kangerlummut angalallutik, inoqarporli allatut iliortunik. Arpattartummi 450-it Nuuk Marathonimi ullumi ingerlanneqartumi peqataapput, 42,195 kilometerit ilaatigut arpakkamikku.
Allattoq Mads Lynge
aggustip 03-at 2013 13:25

Flemming Enequist arpannermik aaqqissueqataavoq, silaginneralu aaqqissuussinerlu assut nuannaraa:

- Sila pitsaanerusinnaanngilaq, arpaffigissallugu assut iluarpoq, arpattut assut nuannarigaat takuneqarsinnaavoq, piumassuseqarluarlutillu arpattut takuneqarsinnaalluni, Flemming Enequist oqarpoq.

Østrigimiu Martin Bamminger angutini ajugaavoq, arpanninilu pikkunanaarsimagunarpaa:

- Assut pikkunarpoq, arpaqatigalu Lars Henrik sukkavallaamik aallartissimagunarpugut. Apuukkiartuaaleratta assut pikkunarpoq, Martin Bamminger, Østrigimeersoq, angutinilu ukioq manna Nuuk Marathonimi ajugaasoq, apuuteqqammerlunilu taama oqarpoq.

Taanna aappanilu Nuummi maanna najugaqarput, silaginneralu assut nuannaarutigaa:

- Sila pitsaanerusinnaanngilaq. Anoreqanngilaq. Tamannalu nalinginnaasuunngilaq, tassami Nuuk anorlerajuttuusaraluarmat. Kiappallaaranilu qiiananngilaq, arpaffigissallugulu assut iluarluni, Martin Bamminger oqarpoq.

Østrigimiu Martin Bamminger 42,195 kilometerit arpakkamigit atorpai akunnerit marlukk minutsit 29-t sekundillu 23-t , 2:29:23

Taassuma aappaa nakorsaavoq, Nuummilu qaammatini arfineq-pingasuni maannamut najugaqarsimallutik.

Nuummiu Katti Frederiksen arnani ajugaavoq. Taassuma atorpai akunnerit pingasut, minutsit 15-it, sekundillu 49-t. 3:15:49

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq