Per Ørum Jørgensen attaviitsunngorpoq
Per Ørum Jørgensenip tunuarnerata kinguneranik Venstret, Konservatiivit Dansk Folkepartiilu folketingimi amerlanerussuteqarunnaarput. Tamannalu Lars Løkke Rasmussenip uppisitaaneranik kinguneqarnavianngitsoq, Per Ørum Jørgensen erseqqissaavoq.
Politikkikkut isumaqatigiinngissutit Per Ørum Jørgensenip konservatiivini ilaasortaajunnaarnerminut tunngavilersuutigai. Jyllandip kitaani peqqinnissaqarfiup aaqqissuussaanera innuttaasullu atugarissaarnerulernissaat anguniarlugu aaqqissuusseqqinnissat piviusunngortinneqannginnerat partiimit aninerminut peqqutaasut, Per Ørum Jørgensen Jyllandspostenimut oqarpoq.
Per Ørum Jørgensen 2005-imi folketingimut qinigaasoq, februaarip qaammataani imigassartorsimatilluni biilernermi kingorna katsorsartippoq. Tamannalu sioqqullugu Konservatiivit sinnerlugit Kalaallit Nunaannut oqaaseqartartuulluni. Atorfik taanna kingorna Tage Leegaardimit tiguneqarpoq.
